Gunnar Örn Gunnarsson – opin vinnustofa að Kambi

Gunnar Örn Gunnarsson (1946-2008) fluttist ásamt fjölskyldu sinni að Kambi á Þjórsárbökkum árið 1986. Á staðnum var vélarskemma sem hann breytti í vinnustofu, þar sem hann starfaði við list sína í rúmlega tvo áratugi en þar hafði hann meðal annars aukið rými til að vinna stærri verk. Samhliða þessu rak Gunnar Örn svo alþjóðlegt sýningarrými, Gallerí Kamb, frá árinu 1998, sem hefur nú verið breytt í gestavinnustofu.

Í sumar stendur yfir yfirlitssýning á verkum Gunnars Arnar, Í undirdjúpum eigin vitundar, í Hafnarborg. Af því tilefni ætlar fjölskylda listamannsins að hafa vinnustofu hans að Kambi opna alla laugardaga í ágúst kl. 11-17. Kambur er staðsettur við Vestra Gíslholtsvatn, miðja vegu milli Selfoss og Hellu, en afleggjarinn er merktur Gíslholti, nr. 284 út frá Þjóðvegi 1, stuttu eftir að ekið er yfir Þjórsárbrú til austurs (akstur frá höfuðborginni tekur tæplega eina og hálfa klukkustund).

Smellið á kort til að fá stærri mynd.

Heitt verður á könnunni og öll hjartanlega velkomin.

Sönghátíð í Hafnarborg – master class í aðalsal

Sönghátíð í Hafnarborg hefur frá upphafi staðið fyrir master class námskeiði fyrir lengra komna söngnemendur og söngvara. Í ár stendur námskeiðið yfir dagana 20. til 23. júní og fyllir tónlistin því húsakynni Hafnarborgar á meðan. Námskeiðið er haldið í aðalsal safnsins frá morgni til seinniparts dags, svo gestir sem heimsækja sýningar safnsins fá að njóta söngs þátttakenda í leiðinni. Námskeiðinu lýkur svo með tónleikum nemenda sem fara fram fimmtudaginn 23. júní kl. 20 sem hluti af hátíðinni. Leiðbeinandi námskeiðsins að þessu sinni er hin ástsæla sópransöngkona Sigrún Hjálmtýsdóttir (Diddú) en henni til fulltingis er píanóleikarinn Helga Bryndís Magnúsdóttir, sem mun einnig koma fram með nemendum á tónleikunum.

Nánari upplýsingar um Sönghátíð í Hafnarborg má finna á heimasíðu hátíðarinnar, www.songhatid.is.

List í almannarými – ný veggmynd eftir Juan

Í hádegi föstudagsins 10. júní afhjúpaði Rósa Guðbjartsdóttir, bæjarstjóri Hafnarfjarðar, nýtt vegglistaverk eftir listamanninn Juan á gafli Strandgötu 4, sem hefur verið prýddur margs konar veggmyndum síðustu ár. Undanfari málsins var sá að Juan hafði samband við Hafnarfjarðarbæ varðandi það hvort bærinn hefði til umráða húsnæði sem væri hentugt til slíks framtaks en Juan hefur vakið athygli fyrir veggmyndir sínar í almannarými víða um land undanfarin misseri.

Menningar- og ferðamálanefnd tók vel í erindi Juans og fór þess á leit við listamanninn að hann skilaði hugmynd að veggmynd við Strandgötu en skissan sem Juan lagði fram í kjölfarið byggði á minnisvörðum og útilistaverkasafni bæjarins, þar sem veggmyndin sýnir meðal annars valin verk í umsjá Hafnarborgar. Því næst var haft samband við alla höfunda listaverkanna eða afkomendur þeirra en öll gáfu þau góðfúslegt leyfi fyrir því að nota myndir af verkum sínum með þessum hætti og fá þau bestu þakkir fyrir.

Á veggmyndinni má sjá eftirtalin listaverk og minnisvarða:
· Dýrkun eftir Ásmund Sveinsson
· Skjól fyrir vinda eftir Barböru Tieaho
· Gullna hliðið eftir Elizu Thoenen-Steinle
· Minnisvarði um fyrstu lútersku kirkjuna eftir Hartmut Wolf eða Lupus
· Tröll eftir Pál á Húsafelli
· Hafnarfjarðartilbrigði eftir Sebastian
· Slæmt samband eftir Sonju Renard
· Verk án titils eftir Sólveigu Baldursdóttur
· Hundrað ára einsemd og verk án titils eftir Sverri Ólafsson
· Vaktin eftir Timo Solis
· Sigling eftir Þorkel G. Guðmundsson

Á veggmyndinni er einnig QR-kóði sem vísar á útilistaverkavef Hafnarborgar og verður vonandi til þess að vekja athygli og áhuga íbúa og aðkomumanna á þessu merkilega safni sem njóta má á eigin forsendum, á hvaða stund sem er. Í samræmi við markmið Hafnarborgar og Heilsubæjarins Hafnarfjarðar eru áhugasamir því eindregið hvattir til þess að fá sér göngu um bæinn – skoða verkin, staldra við og leyfa listinni að efla andann.

Hægt er að heimsækja útilistaverkavef Hafnarborgar hér.

Menningar- og heilsugöngur sumarið 2022 – dagskrá

Hafnarfjarðarbær býður upp á menningar- og heilsugöngur öll miðvikudagskvöld í sumar. Flestar göngurnar taka um klukkustund og hefjast kl. 20, nema annað sé tekið fram. Menningar- og heilsugöngur eru samstarfsverkefni Hafnarborgar, Byggðasafns Hafnarfjarðar, Bókasafns Hafnarfjarðar og Heilsubæjarins Hafnarfjarðar. Þátttaka er ókeypis og öll velkomin.

Dagskrá sumarsins er eftirfarandi:


1. júní kl. 20
Hús í hrauninu
Jónatan Garðarsson leiðir göngu að fyrsta og þriðja húsi Hreins Friðfinnssonar. Athugið að þessi ganga mun taka um þrjár klukkustundir. Gengið frá Gerðinu, sunnan megin við Álverið. Nánar hér.

8. júní kl. 20
Álfaganga
Silja Gunnarsdóttir, eigandi alfar.is, leiðir göngu um álfaslóðir og segir sögu álfa, dverga og huldufólks á leiðinni. Gengið frá Ráðhúsi Hafnarfjarðar að Strandgötu 6.

15. júní kl. 17
Barnaganga
Hildigunnur Sigvaldadóttir leiðir yngri kynslóðina í ævintýralegri göngu með listsköpun. Gengið frá Bókasafni Hafnarfjarðar að Hellisgerði og til baka.

22. júní kl. 18
Söguganga um náttúruna
Jónatan Garðarson leiðir göngu upp á Seldalsháls að Stórhöfða. Gengið frá bílastæðinu vestan megin við Hvaleyrarvatn (nær Völlum).

29. júní kl. 20
Kringum hamarinn
Ólafur Þ. Harðarson leiðir göngu í kringum Hamarinn og fjallar um sögu skóla og íþrótta á svæðinu. Gengið frá Flensborgarskóla.

6. júlí kl. 20
Ha ha um Hafnarfjörð
Einar Skúlason leiðir gesti og gangandi um skemmtilegar slóðir í Suðurbæ Hafnarfjarðar og reitir af sér valda Hafnarfjarðarbrandara á leiðinni. Gengið frá Firði verslunarmiðstöð

13. júlí kl. 20
Hugleiðing um álfa
Bryndís Björgvisdóttir, rithöfundur, sagn- og þjóðfræðingur, og Aldís Arnardóttir, forstöðumaður Hafnarborgar, leiða göngu þar sem velt er upp hugleiðingum um álfa og verur í klettum. Gengið frá Hafnarborg og gangan endar svo með leiðsögn um sýningu Gunnars Arnar Gunnarssonar í Hafnarborg. Nánar hér.

20. júlí kl. 17
Þessir gömlu góðu
Janus Guðlaugsson, eigandi Janusar heilsueflingar, rifjar upp, kennir og leiðir stórfjölskylduna alla í gegnum þessa gömlu góðu útileiki sem voru vinsælir fyrir ekki svo mörgum árum síðan. Tilvalin skemmtun fyrir alla í fjölskyldunni. Gengið frá Víðistaðakirkju.

27. júlí kl. 20
Æskuslóðir í Suðurbænum
Leifur Helgason leiðir göngu um æskuslóðir sínar í Suðurbænum. Gengið frá Gúttó.

3. ágúst kl. 17
Buslganga að Arnarvatni
Davíð Arnar Stefánsson leiðir göngu að Arnarvatni. Ef veðrið er gott er kjörið að taka með sér teppi og nesti og busla í vatninu. Gengið frá bílastæðinu við Seltún, Krýsuvík.

10. ágúst kl. 18
Villtar matjurtir í Hafnarfirði
Mervi Orvokki Luoma leiðir gesti um Hafnarfjörð í leit að gómsætum, villtum jurtum. Gengið frá Bókasafni Hafnarfjarðar

17. ágúst kl. 20
Umhverfis eitt Klifsholtanna
Valgerður M. Hróðmarsdóttir leiðir göngu umhverfis eitt Klifsholtanna, að Lambgjá og Smyrlabúð með viðkomu í gróðurreit Rótarý og Lionsklúbbs Hafnarfjarðar. Gengið frá bílastæðinu við Helgafell.

24. ágúst kl. 17
Kyrrðarganga við Stórhöfða
Guðbjörg Björnsdóttir og Ingibjörg Valgeirsdóttir, eigendur fræðslufyrirtækisins Saga Story House, leiða kyrrðargöngu við Stórhöfða. Um er að ræða rólega göngu með leiddum núvitundaræfingum þar sem gengið er að hluta til í þögn. Gengið frá bílastæðinu vestan megin við Hvaleyrarvatn (nær Völlum).

31. ágúst kl. 20
Sagan, safnið og gamli bærinn
Björn Pétursson, bæjarminjavörður Hafnarfjarðar, leiðir göngu um gamla bæinn. Gengið frá Pakkhúsi Byggðasafnsins.


Nánari upplýsingar um göngurnar má svo finna hér á viðburðasíðu Hafnarfjarðarbæjar, þegar nær dregur hverri göngu.

Sumarnámskeið 2022 – myndlist og tónlist

Hafnarborg býður upp á myndlistar- og tónlistarnámskeið fyrir börn á aldrinum 6–12 ára í sumar, líkt og fyrri ár. Farið verður í rannsóknarleiðangra og undirstöðuatriði myndlistar kynnt í gegnum rannsóknir á umhverfinu, sýningar í safninu og skapandi vinnu. Unnin verða verkefni í fjölbreytta miðla – teiknað, málað og mótað – með það að markmiði að þjálfa sjónræna athygli, örva skapandi hugsun og persónulega tjáningu barnanna.

Í boði eru tvö 5 daga námskeið og eitt 4 daga námskeið fyrir aldurshópana 6–9 ára og 10–12 ára. Ekkert námskeiðanna verður eins og því er börnum velkomið að taka þátt í fleiri en einu af námskeiðunum. Þá verður námskeiðið sem hefst þann 20. júní með tónlistar- og söngívafi í tengslum við Sönghátíð í Hafnarborg. Lýkur því námskeiði með þátttöku barnanna í fjölskyldutónleikum á Sönghátíð föstudaginn 24. júní kl. 17.

Myndlistarkennari er Unnur Mjöll S. Leifsdóttir og tónlistarkennari er Kolbrún Berglind Grétarsdóttir.


Boðið verður upp á eftirfarandi sumarnámskeið:

13. júní–16. júní*
6–9 ára: kl. 9:00–12:00
10–12 ára: kl. 13:00–16:00
*Athugið að ekki er kennt á þjóðhátíðardaginn 17. júní.

20. júní–24. júní
6–9 ára: kl. 9:00–12:00
10–12 ára: kl. 12:30–15:30

27. júní–1. júlí
6–9 ára: kl. 9:00–12:00
10–12 ára: kl. 13:00–16:00


Námskeiðsgjald er 14.900 krónur fyrir 5 daga námskeið og 11.920 krónur fyrir 4 daga námskeið. Veittur er systkinaafsláttur: fullt gjald er greitt fyrir eitt barn en 50% afsláttur er veittur af námskeiðsgjaldi annarra systkina. Þá eru foreldrar og forráðamenn vinsamlegast beðnir að láta vita ef barn er með sérþarfir sem taka þarf tillit til.

Athugið að fjöldi þátttakenda í sumarnámskeiðunum er takmarkaður.

Skráning er opin frá mánudeginum 9. maí í gegnum vef Hafnarfjarðarbæjar eða beint á skráningarsíðu. Frekari upplýsingar um sumarnámskeiðin eru veittar í síma 585 5790 eða í gegnum netfangið [email protected].

List án landamæra 2022 – einkasýning í Hafnarborg

Starfsfólk Hafnarborgar óskar Elfu Björk Jónsdóttur innilega til hamingju með útnefninguna listamaður hátíðarinnar Listar án landamæra í ár en Elfa Björk mun halda einkasýningu í Hafnarborg í haust í tengslum við hátíðina.

Elfa Björk Jónsdóttir er hæfileikarík listakona en segja má að myndheimur hennar byggist á abstraktgrunni og skapast oft skemmtilegt samspil formrænu og fígúratífu þegar hún sækir sér fyrirmyndir ýmist úr umhverfinu, náttúrulífsbókum eða úr listasögunni.

List án landamæra 2022 mun eiga sér stað frá 15.-30. október.

Með Elfu Björk á myndinni eru Jóhanna Ásgeirsdóttir, listrænn stjórnandi hátíðarinnar, og Aldís Arnardóttir, forstöðumaður Hafnarborgar.

Opnunartími í Hafnarborg um páskana

Hafnarborg óskar vinum og velunnurum gleðilegra páska. Opnunartími um hátíðina er eftirfarandi:

Skírdagur 14. apríl
Opið kl. 12–17

Föstudagurinn langi 15. apríl
Lokað

Laugardagur 16. apríl
Opið kl. 12–17

Páskadagur 17. apríl
Lokað

Annar í páskum 18. apríl
Opið kl. 12–17

Tilnefningar til Íslensku tónlistar­verðlaunanna 2022

Starfsfólk Hafnarborgar óskar Þráni Hjálmarssyni, listrænum stjórnanda Hljóðana, innilega til hamingju með tilnefninguna til Íslensku tónlistarverðlaunanna 2022 en Hljóðön er tilnefnd sem „tónlistarviðburður ársins – hátíðir“ í flokki sígildrar og samtímatónlistar.

Einnig óskum við Andrési Þór Gunnlaugssyni, listrænum stjórnanda Síðdegistóna í Hafnarborg, hjartanlega til hamingju með tilnefningu tónleikaraðarinnar sem „tónlistarviðburður ársins“ í flokki djass- og blústónlistar, auk þess sem við óskum Andrési Þór innilega til hamingju með tilnefningu sína sem „tónlistarflytjandi ársins“ í sama flokki.

Við þökkum ykkur fyrir að auðga starf Hafnarborgar með fagmennsku ykkar og næmni við að miðla tónlist og sköpunarkrafti svo aðrir fái notið. Við þökkum einnig dómnefnd og aðstandendum Íslensku tónlistarverðlaunanna kærlega fyrir þann heiður sem stofnuninni er sýndur með tilnefningunum.

Sjónarhorn – fræðslustundir fyrir eldra fólk í Hafnarborg

Hafnarborg leggur áherslu á að gefa öllum tækifæri til að kynnast menningu og listum og býður upp á leiðsagnir fyrir alla aldurshópa. Sjónarhorn er dagskrá ætluð eldra fólki, sem hefur áhuga á menningu og listum, til að fræðast um starfsemi Hafnarborgar, yfirstandandi sýningar eða einstök verk úr safneign.

Viðburðirnir skapa tækifæri fyrir gesti til að nálgast myndlistina á margvíslegan hátt með spjalli við sérfræðinga safnsins. Boðið verður upp á kaffi og meðlæti í Hafnarborg að lokinni dagskrá.

Boðið verður upp á fjölbreytta dagskrá kl. 14 einn miðvikudag í mánuði yfir vetrartímann. Hægt er að skrá sig í síma 585 5790 eða með því að senda póst á netfangið [email protected]. Aðgangur er ókeypis


Dagskrá vorannar

16. mars kl. 14
Ljósmyndahátíð – Hallgerður Hallgrímsdóttir
Leiðsögn um sýninguna Fáeinar vangaveltur um ljósmyndun – III. hluti  á verkum Hallgerðar Hallgrímsdóttur. Hallgerður notar ljósmyndamiðilinn sem tæki til að beina sjónum sínum að ljósmyndasögunni og mismunandi tækni hennar. Sýningin er hluti af Ljósmyndahátíð 2022.

13. apríl kl. 14
Verk úr safneign
Í safneign Hafnarborgar eru nú tæplega 1600 verk, unnin með fjölbreyttum aðferðum. Þar má meðal annars finna málverk, teikningar, þrívíð verk og vídeóverk, auk þess sem safnið hefur umsjón með útilistaverkum Hafnarfjarðar. Fjallað verður ítarlega um valin verk úr safneign Hafnarborgar.

11. maí kl. 14
HönnunarMars – Tinna Gunnarsdóttir
Leiðsögn um sýningu Tinnu Gunnarsdóttur, Snert á landslagi. Verkin á sýningunni eru hluti af yfirstandandi doktorsverkefni Tinnu sem byggir á áralangri rannsókn hennar í Héðinsfirði, þar sem hún kannar tengsl manns og landslags. Sýningin er hluti af HönnunarMars 2022.

Haustsýning Hafnarborgar 2022 – vinningstillaga Sigrúnar Ölbu Sigurðardóttur

Listráð Hafnarborgar hefur valið tillöguna flæðir að – flæðir frá  sem haustsýningu ársins 2022 úr hópi þeirra tillagna sem bárust undir lok síðasta árs en vinningstillagan var send inn af Sigrúnu Ölbu Sigurðardóttur. Í sýningarhugmyndinni er sjónum beint að strandlengjunni, sem er jafnt stórbrotin og uppfull af smáum lífverum, viðkvæmum gróðri og fjölbreyttum steinategundum. Takast þar á hið stóra og ofsafengna, hið smáa og viðkvæma, er öldurnar skella með krafti á ströndinni.

Á sýningunni verður strandlengjan skoðuð í gegnum verk listamanna frá ólíkum löndum þar sem sjórinn og strandlengjan mótar bæði menningu og atvinnulíf. Íbúar við sjávarsíðuna hafa í gegnum aldirnar byggt lífsviðurværi sitt að stórum hluta á nálægðinni við hafið en ströndin skilgreinir bæði mörk heimsins fyrir íbúana og er tenging þeirra við aðra heima. Hlutverk strandlengjunnar í þessu sambandi kann því að varpa ljósi á margvísleg viðhorf til umhverfisins, ábyrgð og stöðu mannsins í náttúrunni á mannöld.

Á tímum loftslagsbreytinga má líta á strandlengjuna sem eins konar átakasvæði. Hækkandi sjávarborð hefur bein áhrif á strandlengjuna – lífverur við ströndina eiga eftir að hverfa og aðrar nema land með hækkandi hitastigi og svo getur farið að hugsa þurfi byggð og búsetu við sjóinn út frá nýjum forsendum. Þá mun sýningin draga fram hversu samlíf okkar við náttúruna er viðkvæmt og dýrmætt, í þeirri von að hreyfa við áhorfendum og fá gesti til að hugsa um viðhorf sitt til strandlengjunnar á nýjan hátt og í nýju samhengi.

Listi yfir þátttakendur sýningarinnar verður birtur síðar.

Sigrún Alba Sigurðardóttir er sjálfstætt starfandi sýningarstjóri en hún hefur sett upp sýningar í Listasafni Íslands, Listasafni Árnesinga, Ljósmyndasafni Reykjavíkur og Þjóðminjasafni Íslands. Þá vinnur hún nú að sýningu í samstarfi við Fotografisk Center í Danmörku, Landskrona Foto í Svíþjóð, Northern Photographic Center í Finnlandi og Listasafn Akureyrar. Sigrún Alba er stundakennari í listfræði við Háskóla Íslands og við hönnunardeild Listaháskóla Íslands. Hún hefur gefið út sjö bækur og fjölda fræðigreina, m.a. um íslenska myndlist og ljósmyndun.

Þessi sýning verður sú tólfta í haustsýningarröð Hafnarborgar en markmið hennar er að safnið sé vettvangur þar sem myndlist fái að njóta sín, mótuð af fjölbreyttum viðhorfum og viðfangsefnum. Það er Listráð Hafnarborgar ásamt forstöðumanni sem fer yfir umsóknir og velur vinningstillöguna ár hvert.