Þögult vor – Skógræktarfélagið og Kliður

Í tilefni af opnun sýningarinnar Þöguls vors, eftir Herttu Kiiski, Katrínu Elvarsdóttur og Lilju Birgisdóttur, í sýningarstjórn Daríu Sólar Andrews, gleður það okkur að segja frá því að Skógræktarfélag Reykjavíkur ætlar að gróðursetja eitt tré fyrir hvern gest sem mætir á sýningaropnunina.

Við erum innilega þakklát fyrir þetta frábæra framlag Skógræktarfélagsins, sem leggur umhverfinu lið allan ársins hring með sínu ómetanlega starfi og hjálpar okkur að hlúa að náttúrunni með þessum hætti.

Þá vekjum við sömuleiðis athygli á því að sérstakur gjörningur með kórnum Klið, ásamt Lilju Birgisdóttur, mun eiga sér stað við opnun sýningarinnar.

Opnunin fer fram laugardaginn 18. janúar kl. 15. Á sama tíma opnar einnig sýningin Far, með verkum Þórdísar Jóhannesdóttur og Ralphs Hannam. Báðar sýningarnar eru hluti af Ljósmyndahátíð Íslands, sem stendur yfir 16.–19. janúar.

Verið hjartanlega velkomin í Hafnarborg.

Hádegistónleikar – vetur/vor 2020

Fyrstu hádegistónleikar ársins 2020 fara fram í aðalsal Hafnarborgar þriðjudaginn 4. febrúar kl. 12. Þar mun koma fram Herdís Anna Jónasdóttir, sópran, ásamt Antoníu Hevesi, píanóleikara og listrænum stjórnanda hádegistónleika í Hafnarborg. Tónleikaröðin hefur verið hluti af dagskrá Hafnarborgar undanfarin sextán ár.

Hér má sjá dagskrá hádegistónleika fram á vor:

4. febrúar
Herdís Anna Jónasdóttir, sópran

3. mars
Sigrún Hjálmtýsdóttir (Diddú), sópran

7. apríl
Kolbeinn Ketilsson, tenór (frestað)

5. maí
Gissur Páll Gissurarson, tenór (frestað)

Hádegistónleikar eru vanalega á dagskrá Hafnarborgar fyrsta þriðjudag hvers mánaðar yfir vetrartímann. Þeir hefjast tímanlega kl. 12 og standa yfir í um hálfa klukkustund. Húsið opnar kl. 11:30 og tónleikarnir eru öllum opnir á meðan húsrúm leyfir. Aðgangur er ókeypis.

Dagskrá er birt með fyrirvara um breytingar.

Jóla- og nýárskveðja frá Hafnarborg

Starfsfólk Hafnarborgar óskar ykkur öllum, vinum og velunnurum stofnunarinnar, gleðilegra jóla og gæfuríks komandi árs, með hugheilum þökkum fyrir árið sem er að líða.

Hlökkum til að sjá ykkur í Hafnarborg á nýju ári.

Kærleikskúlan 2019 – uppseld í safnbúð

Kærleikskúla ársins 2019 er uppseld í safnbúð Hafnarborgar, líkt og hjá mörgum söluaðilum á höfuðborgarsvæðinu. Fáar eru eftir hjá öðrum en því mælum við með að hringja á undan og ganga úr skugga um að kúlan sé til. Lista yfir söluaðila Kærleikskúlunnar má finna hér.

Enn eru örfáir Jólaóróar eftir í safnbúð Hafnarborgar.

Opnunartími í Hafnarborg yfir hátíðarnar

Opið verður í Hafnarborg að vanda fram að jólum, alla daga nema þriðjudaga, kl. 12–17. Opnunartími yfir hátíðarnar er eftirfarandi:

Þorláksmessa 23. desember – opið kl. 12–17

Aðfangadagur 24. desember – lokað

Jóladagur 25. desember – lokað

Annar í jólum 26. desember – lokað

27.–30. desember – opið kl. 12–17

Gamlársdagur 31. desember – lokað

Nýársdagur 1. janúar – lokað

Skrifstofa Hafnarborgar verður lokuð á milli jóla og nýárs. Opið verður samkvæmt hefðbundnum opnunartíma aftur frá 2. janúar. Aðgangur er ókeypis og allir velkomnir.

Kærleikskúlan 2019 – fáanleg í safnbúð

SÓL ÉG SÁ eftir Ólöfu Nordal er Kærleikskúla ársins 2019. Kærleikskúlan er fallegur listmunur og skemmtileg til söfnunar en það sem gerir hana dýrmæta er innihaldið – kærleikurinn. Nafn kúlunnar er táknrænt en markmiðið með sölu hennar er að auðga líf fatlaðra barna og ungmenna en allur ágóði rennur til starfsemi sumarbúðanna í Reykjadal, sem Styrktarfélag lamaðra og fatlaðra á og rekur. Dvölin í Reykjadal er börnunum og fjölskyldum þeirra afar mikilvæg en þar eru gleði, jákvæðni og ævintýri höfð að leiðarljósi.

Þegar Sæmundur fróði lá banaleguna og mönnum virtist hann andaður hreyfðust á honum þrír fingurnir á hægri hendinni sem vildu þeir taka um eitthvað. Lengi vorumenn í efa um hvað slíkt hefði að þýða. Loksins voru ýmsir hlutir bornir að fingrunum en þeir héldu áfram að hreyfast þangað til þeim var fenginn penni. Þá beygði sig einn fingurinn utan um hann, síðan var réttur pappír hinum fingrunum og beygði sig annar fingurinn að honum, þá var nú sjálfsagt að fá hinum þriðja blekbyttuna. Eftir það skrifuðu fingurnir Sólarljóð og þegar þeim var lokið slepptu þeir ritfærunum og urðu máttvana og hreyfðust aldrei síðan.

Ólöf Nordalnam við Myndlista- og handíðaskóla Íslands, „Gerrit Rietveld“-akademíuna í Amsterdam, lauk meistaraprófi frá Cranbrook Academy of Art í Michigan og síðar meistaraprófi frá höggmyndadeild Yaleháskólans í Connecticut, Bandaríkjunum. Árið 2005 hlaut hún hin virtu „Richard Serra“-verðlaun. Ólöf er höfundur margra útilistaverka og minnisvarða á opinberum vettvangi. Verk Ólafar eru iðulega sprottin úr heimi þjóðsagna og þjóðtrúar. Listrannsóknir hennar beinast að sjálfsmynd þjóðarinnar á eftirnýlendutímum, uppruna og endurspeglun þjóðsagnaminna í samtímanum og brotunum sem spegla aftur til fortíðar.

Kærleikskúlan er blásin glerkúla, tær eins og kærleikurinn með borða í rauðum lit. Litur lífskrafts og gleði, jóla og vináttu. Eins og mennirnir eru engar tvær kúlur nákvæmlega eins en þær eru allar fallegar – hver á sinn hátt.

Kærleikskúlan verður fáanleg í safnbúð Hafnarborgar frá  7. desember til 21. desember.

Syngjandi jól – sýningar lokaðar

Sýningar Hafnarborgar verða lokaðar laugardaginn 7. desember vegna Syngjandi jóla, sem þá fara fram. Þann daginn fyllist Hafnarborg af söng og hátíðaranda, þegar fjölmargir kórar Hafnarfjarðar, skipaðir söngfólki á öllum aldri, koma saman og syngja falleg jólalög í upphafi aðventunnar. Syngjandi jól eru nú haldin í tuttugasta og þriðja sinn en tónleikarnir eru samstarfsverkefni Hafnarfjarðarbæjar, Jólaþorpsins og Hafnarborgar. Aðgangur er ókeypis og allir velkomnir.

Sýningarnar verða opnar eins og venjulega kl. 12–17 alla aðra daga, nema þriðjudaga, fram að jólum.

Ráðstefna á Kjarvalsstöðum – List í almannarými

Fimmtudaginn 28. nóvember kl. 10–16 tekur Hafnarborg þátt í ráðstefnu á Kjarvalsstöðum, í samstarfi við Listasafn Reykjavíkur og Rannsóknarsetur í safnafræðum, undir yfirskriftinni List í almannarými: Þýðing og uppspretta, þar sem rætt verður um list í almannarými og þýðingu hennar fyrir nærsamfélagið eða samfélög í heild. Sérstakur gaumur verður gefinn að uppsprettu slíkra verkefna, hvernig þau verða til, hvernig þau eru fjármögnuð, auk skipulags og utanumhalds þeirra.

Aðalfyrirlesari ráðstefnunnar er Tyra Dokkedahl, sjálfstætt starfandi sýningarstjóri og blaðamaður, sem hefur sérhæft sig í list í almannarými. Aðrir fyrirlesarar verða Steve Christer, arkitekt hjá Stúdíó Granda, Ágústa Kristófersdóttir, forstöðumaður Hafnarborgar, myndlistarmennirnir Anna Hallin, Olga Bergmann, Carl Boutard og Ólöf Nordal og loks Örn Baldursson frá Framkvæmdasýslu ríkisins. Ólöf Kristín Sigurðardóttir, safnstjóri Listasafns Reykjavíkur, heldur opnunarávarp og Sigurður Trausti Traustason, deildarstjóri safneignar og rannsókna hjá Listasafni Reykjavíkur, stýrir ráðstefnunni.

Ráðstefnugjald er 2.500 kr. Innifalið er kaffi yfir daginn og léttur hádegisverður. Skráning fer fram hér.

Haustsýning 2020 – frestur framlengdur

Vinsamlegast athugið að frestur til að skila inn tillögum að haustsýningu næsta árs í Hafnarborg hefur verið framlengdur um eina viku til sunnudagsins 17. nóvember næstkomandi. Haustsýningaröðin hóf göngu sína árið 2011 og hafa síðan verið settar upp níu sýningar í röðinni. Haustsýning Hafnarborgar í ár, Allt á sama tíma, sem opnaði 30. ágúst, var valin með sama hætti, úr þeim tillögum sem bárust á síðasta ári.

Markmiðið með því að óska eftir innsendum tillögum er að fá tækifæri til að velja til samstarfs sýningarstjóra, sem leggja fram áhugaverðar tillögur að sýningum, en jafnframt að kalla til leiks nýtt fólk. Þannig er sérstaklega hugað að því að veita tækifæri sýningarstjórum með stuttan feril að baki. Það hefur sýnt sig að fyllsta ástæða er til að halda úti slíku verkefni en út frá því hafa orðið til fjölbreyttar sýningar, sem vakið hafa athygli og fengið góða aðsókn.

Óskað er eftir hugmyndum að samsýningum þar sem viðfangsefni, vinnuaðferð eða aðrar hugmyndir tengja verk listamanna en einnig koma til greina sýningar sem fela í sér greiningu eða sérstaka sýn á verk ákveðins listamanns. Jafnt koma til greina sýningar á verkum samtímalistamanna og sýningar sem fela í sér sögulega greiningu. Það er listráð Hafnarborgar, ásamt forstöðumanni, sem fer yfir umsóknir og velur vinningstillöguna ár hvert.

Nánari upplýsingar um umsóknarferlið má finna hér.

Vitinn – hlaðvarp Hafnarfjarðarbæjar

Ágústa Kristófersdóttir, forstöðumaður Hafnarborgar, er kvenskörungur mikill og kona allra verka. Hún hefur ósjaldan sést með hamar á lofti og málband um hálsinn við uppsetningu á nýjum sýningum og öðrum þeim verkefnum sem safnið sér um eða tekur þátt í. Stuttu seinna er hún komin í hlutverk gestgjafa og býður gesti velkomna á sýningar, opnanir, leiðsagnir, tónleika og smiðjur með starfsfólki sínu í Hafnarborg. Í þessum þætti Vitans ræðir Ágústa m.a. um listina að lifa og hversu stórt hlutverk list, menning og safnaheimurinn spilar í hennar lífi.

Í Vitanum er spjallað við áhugaverða einstaklinga sem vinna í þágu bæjarins. Þannig er tekin fyrir þjónusta sveitarfélagsins, áhugaverð þróunarverkefni og viðfangsefni á fjölbreyttu sviði. Eins þau mál sem eru í brennidepli hverju sinni. Hægt er að hlusta á þáttinn hér fyrir neðan en aðra þætti Vitans má nálgast hér á síðu Hafnarfjarðarbæjar eða á hlaðvarpsveitum eins og SpotifySimplecast og Podcast Addict. Unnið er að því að gera Vitann aðgengilegan á fleiri veitum.