Sýningin Far opnaði í tilefni Ljósmyndahátíðar Íslands í upphafi árs en henni lauk í síðustu viku með hertu samkomubanni. Þá höfum við tekið sýninguna niður til þess að geta nýtt bæði þennan tíma og sýningarsalinn til að sinna mikilvægu innra starfi stofnunarinnar, með yfirferð og endurskipulagningu á safnkosti Hafnarborgar.

Á sýningunni mátti sjá samtal á milli verka þeirra Þórdísar Jóhannesdóttur, myndlistarmanns, og Ralphs Hannam, áhugaljósmyndara sem starfaði hér á landi um miðja síðustu öld. Þrátt fyrir að sýningunni sé lokið, gefst ykkur nú kostur á að upplifa hana hér í netheimum í gegnum þessa rafrænu leiðsögn, þar sem Ágústa Kristófersdóttir, forstöðumaður Hafnarborgar, segir frá tilkomu sýningarinnar, sköpunarferli listamannanna og völdum verkum á sýningunni.

Við þökkum öllum sem lögðu leið sína í Hafnarborg til að skoða sýninguna, á meðan henni stóð, og vonum að allir megi njóta hennar hér – bæði þeir sem eru að sjá hana í fyrsta sinn og þeir sem hafa séð hana áður. Við hvetjum ykkur enn fremur til að sækja innblástur í þeirra nálgun og finna áhugaverð sjónarhorn í kringum ykkur, í ykkar eigin daglega lífi.

Leiðsögnin er bæði textuð á íslensku og ensku.

Tilkynntar hafa verið styrkúthlutanir myndlistar- og safnasjóðs fyrir árið 2020. Hafnarborg fagnar og þakkar fyrir þá styrki sem veittir eru til verkefna safnsins. Úr safnasjóði hlaut Hafnarborg styrk til tveggja verkefna: Hafnarborg og heilsubærinn (1.500.000 kr.) og Ljósmyndir á ytri vef – samningur við Myndstef (800.000 kr.). Vinna er þegar hafin við bæði verkefnin.

Í samvinnu við Byggðasafn Hafnarfjarðar og fleiri fékk Hafnarborg einnig úthlutað öndvegisstyrk til eins verkefnis: Samstarf um safnfræðslu – stefnumótun og innleiðing (12.000.000 kr. yfir fjögurra ára tímabil).

Þá hlaut Hafnarborg styrk úr myndlistarsjóði til tveggja sýningarverkefna: Borgarhljóðvistir í formi ensks lystigarðs – sýning Davíðs Brynjars Franzsonar, tónskálds, í sýningarstjórn Þráins Hjálmarssonar (300.000 kr.) og Sýningarskrá fyrir sýninguna Lengi skal manninn reyna – verk Þorvaldar Þorsteinssonar, í samstarfi við Listasafnið á Akureyri (500.000 kr.).

Auk þess fengu sýningarstjórar haustsýningar ársins 2020, Becky Forsythe og Penelope Smart, styrk upp á 800.000 kr. til framleiðslu sýningarinnar Villiblómsins, þar sem nýstárlegri linsu verður beint að vilja okkar til að kanna náttúruna.

Styrkveitingar þessar eru mikilvægur liður í því að starfsemi Hafnarborgar geti blómstrað og þjónað samfélaginu með áhugaverðum verkefnum, jafnframt því að vera örvandi vettvangur listsköpunar og skapandi samtals.

Vegna herts samkomubanns verður Hafnarborg lokuð gestum til mánudagsins 4. maí næstkomandi, með fyrirvara um breytingar.

Í millitíðinni vonumst við til að geta miðlað sýningum safnsins, safnkosti Hafnarborgar – og jafnvel fleiru – til ykkar eftir öðrum leiðum.

Svo fylgist endilega með okkur á samfélagsmiðlum með því að smella á hnappana hér fyrir neðan.

Hafnarborg og Myndstef hafa nú undirritað samning um stafræna birtingu á afritum af safnkosti úr rafrænum safnmunaskrám.

Þetta veitir Hafnarborg heimild til að myndvæða allar skráningar safnsins í menningarsögulega gagnasafninu Sarpi og bætir þar með aðgengi almennings að upplýsingum um safnkost Hafnarborgar.

Þá er unnið að því að gera þær myndir af safnkosti Hafnarborgar, sem hafa hingað til ekki verið aðgengilegar almenningi, sýnilegar í Sarpi.

Sýningar Hafnarborgar, Far og Þögult vor, sem opnuðu í tilefni Ljósmyndahátíðar Íslands í janúar síðastliðnum, hafa verið framlengdar fram á vor í ljósi þess að stjórn HönnunarMars hefur tekið þá ákvörðun að fresta hátíðinni vegna aðstæðna. Þá hefur sýningunni efni:við, sem til stóð að opnaði í lok marsmánaðar sem hluti af dagskrá HönnunarMars, einnig verið frestað þar til í sumar.

Yfirstandandi sýningar safnsins eiga það sameiginlegt að beina sjónum okkar að umheiminum, þar sem fegurðarinnar er ýmist leitað í náttúrunni eða nánasta umhverfi okkar, hinu daglega lífi. Jafnframt vekja þær okkur til umhugsunar um það hvernig við sjáum heiminn og það sem við skiljum eftir okkur. Að svo stöddu verður opið á sýningarnar eins og venjulega, alla daga nema þriðjudaga kl. 12–17, með fyrirvara um breytingar. Aðgangur er ókeypis.

Vinsamlegast athugið að skipulögðum viðburðum á vegum safnsins, svo sem tónleikum, leiðsögnum og listasmiðjum, verður frestað eða aflýst á meðan samkomubann er í gildi. Einnig er lögð aukin áhersla á sótthreinsun, þar sem sérlega er hugað að helstu snertiflötum, hurðarhúnum, handriðum og slíku. Þá eru gestir hvattir til að gæta hæfilegrar fjarlægðar hver við annan, jafnt í sýningarsölum og afgreiðslu safnsins.

Frekari upplýsingar um breytta sýningardagskrá Hafnarborgar, nákvæmar dagsetningar og fleira, verða birtar þegar nær dregur.

Þann 11. mars hlaut Hafnarborg Íslensku tónlistarverðlaunin fyrir viðburð ársins (einstaka tónleika), í flokknum sígildri og samtímatónlist, fyrir opnunartónleika sýningarinnar Hljóðana, sem var hluti af dagskrá Myrkra músíkdaga.

Hafnarborg vill þakka slagverksleikaranum Jennifer Torrence, fyrir ógleymanlega túlkun á verkum þeirra Toms Johnson og Bergrúnar Snæbjörnsdóttur, og Þráni Hjálmarssyni, sýningarstjóra, fyrir hans frábæra starf. Einnig þökkum við öllu listafólkinu sem átti verk á sýningunni og tók þátt í viðburðadagskrá í tengslum við hana.

Það er ekki á hverjum degi sem listasafn fær tónlistarverðlaun – en í Hafnarborg hefur tónlistinni í sínum fjölbreytilegu myndum verið sinnt allt frá fyrstu árum starfseminnar. Þessi verðlaun eru okkur hvatning til að halda áfram á þeirri braut.

Takk fyrir okkur!

Hafnarborg og Hafnarfjarðarbær hafa nú gerst stuðningsaðilar við verkefnið Tónagull po polsku (Tónagull á polsku), þar sem boðið verður upp á vikulegar tónlistarsmiðjur fyrir pólskumælandi börn og foreldra í Hafnarborg frá og með sunnudeginum 8. mars. Verkefnið nýtur einnig stuðnings Pólska sendiráðsins.

Tónagull er tónlistarnámskeið sem stofnað var af Helgu Rut Guðmundsdóttur, tónmenntakennara, með það markmið að mæta þörfum ungbarna, 0-3 ára, og foreldrum þeirra. Fyrsta Tónagullsnámskeiðið var haldið árið 2004 og hafa þau verið haldin samfleytt síðan en hundruðir fjölskyldna hafa sótt þau ár hvert. Námskeiðin eru haldin einu sinni í viku og byggjast á frjálslegri nálgun, þar sem virk þátttaka barna og foreldra er aðalatriði. Jafnframt hefur efni námskeiðanna frá upphafi byggst aðallega á íslenskum þulum og vögguvísum, þ.e. móðurmáli þátttakenda.

Árið 2019, fór svo fram fyrsta tónlistarnámskeiðið á pólsku. Þar er beitt sömu aðferð og á upprunalegu námskeiðunum á íslensku, með þýdddum útgáfum af sumum íslensku laganna, auk þess sem unnið er með pólsk barnalög, þulur og vísur. Tónagull po polsku fékk strax góðar undirtektir og hefur notið mikilla vinsælda hjá pólska samfélaginu á Íslandi.

Frekari upplýsingar um tónlistarsmiðjurnar, tímasetningu, skráningu og fleira, má finna hér á pólsku.

Vinsamlegast athugið að tónlistarsmiðjurnar falla tímabundið niður í ljósi núverandi aðstæðna.

Hljóðön – sýning tónlistar, sem stóð yfir í Hafnarborg 26. janúar–3. mars síðasta árs, hefur hlotið tilnefningu sem tónlistarviðburður ársins (einstakir tónleikar) í flokki sígildrar og samtímatónlistar á Íslensku tónlistarverðlaununum 2020. Í rökstuðningi dómnefndar um sýninguna segir: „Spennandi og frumleg sýning með áhrifaríkum upphafstónleikum. Hér var unnið með samspil tónlistar og rýmis og flutningur Jennifer Torrence á verkinu Níu bjöllur eftir Tom Johnson var einkar vel heppnaður.“

Sýningin fagnaði fimm ára starfsafmæli samnefndrar tónleikaraðar, sem hefur verið á dagskrá Hafnarborgar allt frá árinu 2013 og tileinkuð er samtímatónlist. Við opnun sýningarinnar flutti Jennifer Torrence verkið Níu bjöllur, líkt og nefnt er í rökstuðningi dómnefndar, en flutningur verksins á tónleikum Hljóðana haustið 2016 (þá flutt af Frank Aarnink) var einmitt kveikjan að sjálfri sýningunni, þar sem tónlist og myndlist mættust í tímalausu rými safnsins.

Þeir listamenn sem áttu verk á sýningunni voru Ásta Ólafsdóttir, Steina, Steinunn Eldflaug Harðardóttir, Logi Leó Gunnarsson, Jón Gunnar Árnason, James Saunders, Bergrún Snæbjörnsdóttir, Magnús Pálsson, Tom Johnson, Curver Thoroddsen og Einar Torfi Einarsson. Sýningarstjóri var Þráinn Hjálmarsson, tónskáld og listrænn stjórnandi tónleikaraðarinnar Hljóðana.

Í tengslum við sýninguna var einnig boðið upp á veglega dagskrá, m.a. tónleika, aðra tónlistartengda viðburði og gjörninga, með fjölda innlendra og erlendra myndlistar- og tónlistarmanna, svo sem Haraldi Jónssyni, Ástu Fanneyju Sigurðardóttur, Marko Ciciliani, Barböru Lüneburg, Skerplu, Berglindi M. Tómasdóttur og fleirum. Voru tónleikarnir jafnframt hluti af dagskrá Myrkra músíkdaga, sem hljóta samtals fjórar tilnefningar að þessu sinni.

Hafnarborg þakkar dómnefnd og aðstandendum Íslensku tónlistarverðlaunanna kærlega fyrir þann heiður sem stofnuninni og þátttakendum sýningarinnar er sýndur með þessari tilnefningu.

Hafnarborg verður lokuð vegna veðurs föstudaginn 14. febrúar, þar sem Ríkislögreglustjóri hefur lýst yfir óvissustigi almannavarna fyrir allt landið.

Fólk er almennt hvatt til þess að halda sig heima fyrir hádegi á morgun og fylgjast vel með tilkynningum frá almannavörnum í fjölmiðlum og heimasíðu Veðurstofunnar.

Hafnarborg býður börnum á grunnskólaaldri að koma og taka þátt í skemmtilegum og skapandi listasmiðjum í vetrarfríi 20. og 21. febrúar í tengslum við sýninguna Þögult vor, sem nú stendur yfir í safninu. Smiðjurnar verða hvor með sínu sniðinu, svo velkomið er að taka þátt annan eða báða dagana.

Ljós-myndir
20. febrúar kl. 13–15
Í fyrri smiðjunni verður unnið með sjálft ljósið, þar sem gerðar verða tilraunir með ólík form og myndir á ljósnæman pappír, undir leiðsögn Lilju Birgisdóttur, myndlistarmanns og þátttakanda í sýningunni Þöglu vori, og Ólafar Bjarnadóttur, starfsmanns Hafnarborgar.

Endurunnið efni
21. febrúar kl. 13–15
Í seinni smiðjunni verður unnið með endurunnið eða endurnýtt efni á skapandi hátt, þar sem möguleikar efnisins til listsköpunar eru kannaðir, undir leiðsögn Unnar Mjallar Leifsdóttur, myndlistarmanns, og Ólafar Bjarnadóttur, starfsmanns Hafnarborgar.

Smiðjurnar munu fara fram í Apótekssalnum á fyrstu hæð safnsins og geta börn mætt ásamt foreldrum eða forráðamönnum. Eins og venjulega er þátttaka í smiðjunum og aðgangur að sýningum safnsins gestum að kostnaðarlausu.