Skólaheimsókn

Hafnarborg leggur áherslu á að gefa öllum tækifæri til að kynnast menningu og listum og býður skólahópa sérstaklega velkomna í heimsókn að skoða sýningar safnsins. Markmið heimsóknarinnar er að hvetja nemendur til umhugsunar um myndlist og hönnun – að sjá, skoða, uppgötva og tjá sig.

Myndlistin endurspeglar heiminn í kringum okkur og listafólk tekst á við hinar ólíkustu og áleitustu spurningar um lífið og tilveruna. Þá er hver heimsókn sniðin að þörfum hvers hóps fyrir sig, með tilliti til efnis, áherslna og skólastigs. Miðað er við að heimsókn í safnið taki um það bil eina kennslustund en hægt er að haga lengd heimsóknarinnar að óskum hvers hóps.

Um yfirstandandi sýningar

flæðir að – flæðir frá
Haustsýning Hafnarborgar 2022

Á sýningunni má sjá verk eftir sjö alþjóðlega listamenn sem velta fyrir sér tengingu okkar við hafið, þar sem öldurnar skella á strandlengjunni. Þá eru mörg listamannanna alin upp á eyjum en öll eiga þau það sameiginlegt að koma frá löndum þar sem nálægðin við sjóinn hefur mótað samfélagið, menningu og atvinnulíf með afgerandi hætti. Á tímum loftslagsbreytinga má svo merkja ýmsar breytur við ströndina, líkt og hækkandi sjávarborð, sem hafa mun víðtæk áhrif á vistkerfið til langs tíma, er hafið gefur og hafið tekur.

Listamennirnir sem taka þátt í sýningunni eru Alda Mohr Eyðunardóttir (Færeyjum), Anna Rún Tryggvadóttir (Íslandi), Pétur Thomsen (Íslandi), Stuart Richardson (Íslandi), Studio ThinkingHand (Danmörku/Ástralíu) og Tadashi Ono (Japan). Sýningarstjóri er Sigrún Alba Sigurðardóttir.

Sjá nánar hér.

Vísað í náttúru
Verk úr safneign Hafnarborgar

Á sýningunni má sjá verk sem skírskota á einn eða annan hátt til náttúrunnar, með áherslu á áferðarmikil verk, lífræn form og aflíðandi línur. Þá eru sýnd jafnt tvívíð sem þrívíð verk – lágmyndir sem ljósmyndir, málverk, textíl- og leirlistaverk – en útgangspunktur sýningarinnar var „skúlptúrar úr safneign“.

Enda þótt við lítum oft á ljósmyndir eða olíumálverk sem svo að þau séu bundin við tvívíðan flöt, er auðvitað um að ræða efnisleg verk sem byggð eru upp lag fyrir lag út í rými. Á sýningunni vekja óreglulegt yfirborð, áþreifanleiki og áhrif verkanna á áhorfendur okkur því til umhugsunar um umhverfi okkar og eigin skynjun á dýpt og rými, formi, efni og lögun. Þá er það hin ríka efniskennd verkanna sem sameinar þau þrátt fyrir að þau séu unnin í ólíka miðla.

Sjá nánar hér.

Sköpun tilfinninga
Fræðslusýning

Í Hafnarborg hefur fræðslusýningin Sköpun tilfinninga nú verið sett upp, þar sem lögð er áhersla á tengsl listar og tilfinninga. Þá deildu stofnendur Hafnarborgar, Ingibjörg Sigurjónsdóttir og Sverrir Magnússon, sameiginlegum áhuga á listum en Sverrir var sjálfur í menntaskóla þegar hann upplifði það að fara á málverkasýningu í fyrsta sinn, sem hann lýsti svo: „Ég man að það var einstök tilfinning að sjá málverk í fyrsta sinn.“

Á sýningunni eru valin verk úr safneigninni skoðuð út frá ólíkum birtingarmyndum tilfinninga í listsköpun og nemendur eru hvattir til umræðna og umhugsunar um verkin. Hvernig eru tilfinningar túlkaðar í listsköpun? Getur ákveðið myndefni vakið upp sameiginlegar eða andstæðar tilfinningar hjá áhorfendum?

Sjá nánar hér.

Bóka hóp

Tekið er á móti skólahópum eftir samkomulagi alla virka daga kl. 9–16 og er heimsóknin skólum að kostnaðarlausu. Þá er almennt miðað við að fjöldi nemenda í hverjum hóp sé ekki yfir tuttugu og fimm, svo allir fái sem mest út úr heimsókninni, og er því lagt upp með að skipta fjölmennari hópum upp í tvo eða fleiri smærri hópa.

Vinsamlegast smellið hér til þess að bóka heimsókn eða hafið samband við skrifstofu með því að senda póst á [email protected].