Haustsýning Hafnarborgar 2022 – Vinningstillaga Sigrúnar Ölbu Sigurðardóttur

Listráð Hafnarborgar hefur valið tillöguna flæðir að – flæðir frá  sem haustsýningu ársins 2022 úr hópi þeirra tillagna sem bárust undir lok síðasta árs en vinningstillagan var send inn af Sigrúnu Ölbu Sigurðardóttur. Í sýningarhugmyndinni er sjónum beint að strandlengjunni, sem er jafnt stórbrotin og uppfull af smáum lífverum, viðkvæmum gróðri og fjölbreyttum steinategundum. Takast þar á hið stóra og ofsafengna, hið smáa og viðkvæma, er öldurnar skella með krafti á ströndinni.

Á sýningunni verður strandlengjan skoðuð í gegnum verk listamanna frá ólíkum löndum þar sem sjórinn og strandlengjan mótar bæði menningu og atvinnulíf. Íbúar við sjávarsíðuna hafa í gegnum aldirnar byggt lífsviðurværi sitt að stórum hluta á nálægðinni við hafið en ströndin skilgreinir bæði mörk heimsins fyrir íbúana og er tenging þeirra við aðra heima. Hlutverk strandlengjunnar í þessu sambandi kann því að varpa ljósi á margvísleg viðhorf til umhverfisins, ábyrgð og stöðu mannsins í náttúrunni á mannöld.

Á tímum loftslagsbreytinga má líta á strandlengjuna sem eins konar átakasvæði. Hækkandi sjávarborð hefur bein áhrif á strandlengjuna – lífverur við ströndina eiga eftir að hverfa og aðrar nema land með hækkandi hitastigi og svo getur farið að hugsa þurfi byggð og búsetu við sjóinn út frá nýjum forsendum. Þá mun sýningin draga fram hversu samlíf okkar við náttúruna er viðkvæmt og dýrmætt, í þeirri von að hreyfa við áhorfendum og fá gesti til að hugsa um viðhorf sitt til strandlengjunnar á nýjan hátt og í nýju samhengi.

Listi yfir þátttakendur sýningarinnar verður birtur síðar.

Sigrún Alba Sigurðardóttir er sjálfstætt starfandi sýningarstjóri en hún hefur sett upp sýningar í Listasafni Íslands, Listasafni Árnesinga, Ljósmyndasafni Reykjavíkur og Þjóðminjasafni Íslands. Þá vinnur hún nú að sýningu í samstarfi við Fotografisk Center í Danmörku, Landskrona Foto í Svíþjóð, Northern Photographic Center í Finnlandi og Listasafn Akureyrar. Sýningin verður opnuð í Kaupmannahöfn í janúar 2022. Sigrún Alba er stundakennari í listfræði við Háskóla Íslands og við hönnunardeild Listaháskóla Íslands. Hún hefur gefið út sjö bækur og fjölda fræðigreina, m.a. um íslenska myndlist og ljósmyndun.

Þessi sýning verður sú tólfta í haustsýningarröð Hafnarborgar en markmið hennar er að safnið sé vettvangur þar sem myndlist fái að njóta sín, mótuð af fjölbreyttum viðhorfum og viðfangsefnum. Það er Listráð Hafnarborgar ásamt forstöðumanni sem fer yfir umsóknir og velur vinningstillöguna ár hvert.

Opnunartími í Hafnarborg yfir hátíðarnar

Opið verður í Hafnarborg að vanda fram að jólum, alla daga nema þriðjudaga, kl. 12–17. Opnunartími yfir hátíðarnar er eftirfarandi:

Þorláksmessa: opið kl. 12-17
Aðfangadagur: lokað
Jóladagur: lokað
Annar í jólum: lokað
Mánudagur 27. desember: opið 12-17
Þriðjudagur 28. desember: lokað 
Miðvikudagur 29. desember: opið 12-17
Fimmtudagur 30. desember: opið kl. 12-17
Gamlársdagur: lokað
Nýársdagur: lokað

Vinsamlegast athugið að skrifstofa Hafnarborgar verður lokuð á milli jóla og nýárs. Safnið verður opið samkvæmt hefðbundnum opnunartíma frá 2. janúar. Aðgangur að sýningum safnsins er ókeypis og allir velkomnir.

Kærleikskúlan 2021 – uppseld í safnbúð

Kærleikskúla ársins 2021 er uppseld í safnbúð Hafnarborgar, líkt og hjá mörgum söluaðilum á höfuðborgarsvæðinu. Einhverjar kúlur kunna enn að vera fáanlegar hjá öðrum aðilum en við mælum með að hringja á undan til að ganga úr skugga um að kúlan sé til.

Lista yfir söluaðila Kærleikskúlunnar má finna hér.

Kærleikskúlan 2021 – fáanleg í safnbúð Hafnarborgar

Eitt ár eftir Sirru Sigrúnu Sigurðardóttur er Kærleikskúla ársins 2021. Kúlan er framleidd í takmörkuðu upplagi en á síðasta ári seldist kúlan upp. Allur ágóði af sölunni rennur til starfs í þágu fatlaðra barna og ungmenna. Listakonan lýsir verkinu svo:

Kúlan er umvafin teikningu sem lýsir sólargangi eftir árstíma á Íslandi, allt frá löngum björtum sumarnóttum að vetrarsólstöðum þegar birtu nýtur aðeins í örfáar klukkustundir á dag. Teikningin sýnir ólík birtustig sólarhringsins og þá afgerandi árstíðabundnu sveiflur sem við upplifum hér við heimskautsbaug. Litirnir fimm sem hverfast um kúluna tákna; dögun, birtingu, dagbjart, sólarlag og myrkur. Litirnir sem eru mest áberandi eru; gulur fyrir hábjartan dag og blár fyrir myrkur næturinnar, þar á milli raða sér rauðgulur, bleikur og fjólublár fyrir ljósaskiptin. Verkið reynir að fanga eitthvað sem við þekkjum svo vel í okkar daglega amstri en talar einnig til stærra samhengis okkar, til síbreytilegrar stöðu okkar í himingeimnum þar sem við snúumst um ás á sporbaug um sólu.

Sirra Sigrún Sigurðardóttir hefur lengi tekið virkan þátt í íslensku listalífi en hún er einn af stofnendum Kling & Bang. Sirra lauk BA-prófi frá Listaháskóla Íslands árið 2001 og útskrifaðist með meistaragráðu frá School of Visual Arts í New York 2013. Verk Sirru eru kosmísk í eðli sínu og tengjast gjarnan vangaveltum um stöðu okkar inni í gangverki náttúrunnar, eðlisfræðinnar og þeirra afla sem halda heiminum gangandi. Þau sýna oft stöðu okkar sem einstaklinga, vægi okkar og smæð þar sem hið smáa er sett í samhengi við það stærra og merking er yfirfærð frá einu fyrirbæri yfir á annað svo úr verður ný skynjun, ný sýn. Sirra hefur haldið einkasýningar í Listasafni Reykjavíkur, Nýlistasafninu, Listasafni Árnesinga, Hafnarborg og Kling & Bang. Þá hefur hún tekið þátt í fjölda sýninga víða um heim, þar á meðal í Kína, Finnlandi og á Englandi. Sirra hefur vakið verðskuldaða athygli fyrir list sína og m.a. fengið styrki og viðurkenningar úr listasjóðum Svavars Guðnasonar, Guðmundu Andrésdóttur og verðlaun Guðmundu S. Kristinsdóttur.

Kærleikskúlan verður fáanleg í safnbúð Hafnarborgar frá 9. til 23. desember. Einnig er jólaórói ársins í sölu til og með 16. desember. Hægt er að lesa nánar um óróann hér.

Jólaóróinn 2021 – fáanlegur í safnbúð Hafnarborgar

Jólaóróinn Þvörusleikir er nú fáanlegur í safnbúð Hafnarborgar. Hönnunarteymið Arnar&Arnar hannaði óróann og Kristín Svava Tómasdóttir samdi kvæði um kappann. Þvörusleikir er síðastur í jólaóróaseríu Styrktarfélags lamaðra og fatlaðra sem telur alls sextán óróa. Þá hafa jólasveinarnir þrettán verið færðir í stál ásamt Grýlu, Leppalúða og Jólakettinum.

Margir færustu hönnuðir og fremstu skáld landsins hafa lagt Styrktarfélaginu lið og gefið vinnu sína við að skapa jólaóróana og semja kvæði með óróunum. Þá var Kertasníkir fyrstur í röðinni en hann kom út fyrir jólin 2003.

Hafnarborg hefur verið meðal söluaðila jólaóróans og Kærleikskúlunnar um árabil en vegna tafa sem urðu í framleiðslu- og sendingarferli Kærleikskúlunnar seinkar sölu hennar um nokkra daga. Sölutímabil Kærleikskúlunnar verður því frá 9. desember til og með 23. desember. Allur ágóði af sölu Kærleikskúlunnar og jólaóróans rennur óskiptur til Styrktarfélags lamaðra og fatlaðra.

Jólaóróinn er framleiddur í takmörkuðu upplagi en sölutímabil hans er frá 2. desember til og með 16. desember.

Hvar er Völundur – jóladagatal í Hafnarborg

Hafnarborg telur niður dagana til jóla með því að sýna jóladagatalið Hvar er Völundur? milli kl. 16 og 17 alla opnunardaga safnsins í desember fram að jólum.

Hvar er Völundur? var framleitt af RÚV árið 1996 og er löngu orðið hluti af jólahefðinni. Í dagatalinu leita þeir Felix og Gunni að smiðnum Völundi en hann er sá sem smíðar góðu jólagjafirnar. Við leitina lenda félagarnir í óvæntum ævintýrum er þeir þræða hvert völundarhúsið á fætur öðru og hitta fyrir margvíslegustu þorpara.

Höfundur dagatalsins er listamaðurinn Þorvaldur Þorsteinsson en yfirlitssýning á verkum hans stendur nú yfir í safninu.

Börn og fjölskyldur eru sérstaklega velkomin en hver þáttur verður sýndur í endurtekningu milli kl. 16 og 17 dag hvern. Á þriðjudögum er safnið lokað og verða því tveir þættir sýndir á miðvikudögum. Aðgangur að safninu er ókeypis, eins og alltaf.

Taktu þátt – skráðu þig á póstlistann

Hefurðu áhuga á starfsemi Hafnarborgar? Viltu fá tilkynningar um sýningar, viðburði eða annað sem er á döfinni í safninu hverju sinni? Er netfangið þitt ekki þegar skráð á póstlistann okkar?

Ef svo er hvetjum við þig eindregið til þess að skrá þig á póstlista safnsins með því að rita netfang þitt í reitinn neðst á forsíðu Hafnarborgar og taka í framhaldinu þátt í fjölbreyttri dagskrá safnsins með okkur.

Sjáumst í Hafnarborg.

Myndin af Maríu – taktu þátt í að endurskapa listaverk

Heitirðu María? Býrðu í Hafnarfirði? Hefurðu áhuga á að vera með í listaverki?

Um þessar mundir vinnur Hafnarborg að uppsetningu yfirlitssýningarinnar, Lengi skal manninn reyna, þar sem sýnd verða verk eftir listamanninn Þorvald Þorsteinsson (1960-2013). Á sýningunni stendur til að endurskapa eitt verka listamannsins, Myndina af Maríu, sem Þorvaldur sýndi fyrst á sýningu í Listasafninu á Akureyri árið 1996. Þá mun sýningin í Hafnarborg opna á afmælisdegi Þorvaldar, 7. nóvember næstkomandi.

Myndin af Maríu er þátttökulistaverk sem fólst í því að listamaðurinn óskaði eftir að fá myndir að láni frá þeim sem báru nafnið María og bjuggu á Akureyri. Myndirnar sýndi hann svo allar saman í einu rými safnsins, við milda lýsingu, sveipaðar helgiblæ. Vísaði hann þar til helgra Maríumynda og tengdi saman hversdagsleikann og heilagleikann í verki sínu.

Nú leitar Hafnarborg til María, sem búsettar eru í Hafnarfirði, um að lána safninu myndir af sér til að sýna á væntanlegri yfirlitssýningu á verkum listamannsins. Myndin getur verið passamynd eða stærri ljósmynd, sjálfsmynd tekin á síma, mynd úr fjölskyldualbúminu, teikning eða málverk, ef slíkt er til, andlitsmynd eða heilmynd, allt eftir smekk. Þá skiptir stærð eða aldur myndarinnar ekki máli, heldur er leitast eftir því að fjölbreytni í formi og útliti verði sem mest.

Myndinni er ýmist hægt að koma til skila í afgreiðslu Hafnarborgar á opnunartíma safnsins eða í tölvupósti á netfangið [email protected] en gæta þarf að myndinni fylgi fullt nafn og símanúmer þátttakanda. Tekið verður við myndum til 10. október. Að sýningu lokinni munu þátttakendur svo geta nálgast mynd sína í afgreiðslu safnsins.

Ef þú hefur áhuga en eitthvað er óljóst, endilega hafðu samband í síma 585 5790.

Tónagull – tónlistarsmiðjur á pólsku í vetur

Tónagull er tónlistarnámskeið sem byggir á áralangri reynslu en aðferðafræðin er hönnuð sérstaklega fyrir börn á yngsta skeiði og foreldra þeirra. Tónlistarsmiðjur á pólsku hafa svo verið haldnar reglulega síðan árið 2019 við miklar vinsældir. Í samstarfi við Hafnarfjarðarbæ og Hafnarborg er nú boðið upp á smiðjur fyrir pólskar fjölskyldur í Hafnarfirði en fyrstu tónlistarsmiðjurnar á pólsku voru haldnar í safninu vorið 2020.

Smiðjurnar verða haldnar einu sinni í viku í Hafnarborg – alla sunnudaga frá 9. janúar – en þær byggjast á frjálslegri nálgun og leik, sem bæði börn og foreldrar hafa gaman af. Tónlistarsmiðjurnar eru sniðnar fyrir börn á aldrinum 8-10 mánaða en henta þó einnig yngri og eldri þátttakendum (allt upp í þriggja ára aldur), sem fá að kynnast heiminum í gegnum tónlist á námskeiðunum.

Fyrsta Tónagullsnámskeiðið var haldið í janúar 2004 og hefur námskeiðum sífellt fjölgað í samræmi við eftirspurn síðan. Þá sjást þessar góðu viðtökur ekki síst á því að foreldrar koma oft aftur þegar fjölskyldan stækkar. Námskeiðsefnið var þróað af Helgu Rut Guðmundsdóttur, prófessor í tónmennt við Menntavísindasvið Háskóla Íslands.

Í smiðjunum er unnið:

  • á pólsku
  • með vinsæl barnalög og frumsamda tónlist

Þá er einnig notast við einföld og barnvæn hljóðfæri. Ekki er gerð nein krafa um það að þátttakendur námskeiðanna hafi sérstakan grunn í tónlist. Leiðbeinandi gætir þess að námskeiðin gangi vel fyrir sig og leiðir þátttakendur í gegnum efnið, skref fyrir skref, í leik með tónlist. Vefsíðu smiðjanna má finna hér á pólsku.

Komið endilega og sjáið sjálf hversu gefandi það er að búa til tónlist saman. Þátttökugjald fyrir hverja smiðju er aðeins 500 krónur. Skráning fer fram hér.


Tónagull – warsztaty dla rodziców z dziećmi w wieku 0-3
Niedzielę o godz. 12, w Hafnarborg

Tónagull to oparta o wieloletnią praktykę metoda warsztatów muzycznych utworzona specjalnie z myślą o dzieciach należących do najmłodszej grupy wiekowej i ich rodzicach. Od września 2019 spotkania w języku polskim odbywają się regularnie w Reykjaviku i cieszą się ogromną popularnością. Dzięki wsparciu miasta Hafnarfjörður oraz centrum sztuki Hafnarborg teraz dostępna będzie także dla polskich rodzin mieszkających w Hafnafjörður.

Spotkania będą się odbywać – w każdą niedzielę o godz. 12, począwszy od 9 styczeń– a ich forma przypomina muzyczną zabawę, z której radość czerpią zarówno dzieci, jak i ich opiekunowie. Warsztaty znakomicie odpowiadają na potrzeby dzieci w wieku 8-10 miesięcy, jednak zarówno młodsi, jak i starsi uczestnicy (do ok. 3 roku życia) będą w równym stopniu cieszyć się przebiegiem zajęć odkrywając świat za pomocą dźwięków.

Pierwsze warsztaty Tónagull odbyły się w styczniu 2004 i od tamtej pory spotkania cieszą się wciąż rosnącą popularnością. O pozytywnym odbiorze warsztatów świadczy także fakt, że rodzice uczestniczący w spotkaniach często wracają kolejny raz, kiedy w ich życiu pojawiają się nowe pociechy. Metoda opracowana została przez Helgę Rut Guðmundsdóttir, wykładowczynię na Uniwersytecie Islandzkim.

Na zajęciach pracować będziemy:

  • w języku polskim
  • w oparciu o popularne piosenki dziecięce oraz oryginalne kompozycje

Będziemy także korzystać ze specjalnie przygotowanego zestawu prostych, bezpiecznych dla dzieci instrumentów muzycznych. Aby uczestniczyć w warsztatach nie musisz mieć żadnego przygotowania muzycznego! Kierujący warsztatami pedagog przeprowadzi uczestników krok po kroku przez całą strukturę zajęć za pomocą kolejnych muzycznych zabaw. Zapraszamy na stronę internetową warsztatów po polsku.

Przyjdź, aby przekonać się jak niezwykle wzbogacającym doświadczeniem jest wspólne muzykowanie. Koszt jednych zajęć wynosi tylko 500 ISK. Kliknij tutaj by się zapisać.

Haustsýning 2022 – kallað eftir tillögum

Líkt og undanfarin ár, gefst sýningarstjórum tækifæri til að senda inn tillögur að haustsýningu næsta árs í Hafnarborg. Haustsýningaröðin hóf göngu sína árið 2011 og hafa síðan verið settar upp ellefu sýningar í röðinni. Haustsýning Hafnarborgar í ár, Samfélag skynjandi vera, sem opnaði 28. ágúst síðastliðinn, var valin með sama hætti, úr þeim tillögum sem bárust á síðasta ári.

Markmiðið með því að óska eftir innsendum tillögum er að fá tækifæri til að velja til samstarfs sýningarstjóra eða sýningarstjórateymi, sem leggur fram áhugaverða sýningartillögu, auk þess að kalla nýtt fólk til leiks. Eru sýningarstjórar með stuttan feril að baki því sérstaklega hvattir til að sækja um. Það hefur enda sýnt sig að fyllsta ástæða er til að halda úti slíku verkefni en út frá því hafa orðið til fjölbreyttar sýningar, sem vakið hafa athygli og fengið góða aðsókn.

Óskað er eftir hugmyndum að samsýningum þar sem viðfangsefni, vinnuaðferð eða aðrar hugmyndir tengja verk listamanna en einnig koma til greina sýningar sem fela í sér greiningu eða sérstaka sýn á verk ákveðins listamanns. Jafnt koma til greina sýningar á verkum samtímalistamanna og sýningar sem fela í sér sögulega greiningu. Það er listráð Hafnarborgar, ásamt forstöðumanni, sem fer yfir umsóknir og velur vinningstillöguna.

Vinsamlegast athugið að frestur til að skila inn tillögum hefur verið framlengdur um tvær vikur til miðnættis sunnudaginn 24. október næstkomandi.

Aðeins er tekið við tillögum í tölvupósti á netfangið [email protected].


Umsóknarferli

Umsóknarferlið er tvískipt. Vinsamlegast kynnið ykkur ferlið vel með því að fara yfir þau atriði sem óskað er eftir hér fyrir neðan.

1. hluti

Í fyrri umferð er óskað eftir eftirfarandi upplýsingum:

  • Lýsingu á verkefninu þar sem lögð er áhersla á hugmyndina að baki sýningunni (hámark 1000 orð).
  • Ferilskrá(m) sýningarstjóra.
  • Stuttum ferilskrám listamanns eða -manna, auk annarra sem lagt er til að verði hluti af sýningarverkefninu.

Gefa skal eins nákvæma lýsingu og unnt er, innan uppgefinna marka um orðafjölda. Einnig er leyfilegt er að láta myndefni, sem er lýsandi fyrir verkefnið, fylgja tillögunni, þó ekki séu gerðar kröfur um slíkt í fyrri umferð. Þá er umsækjendum bent á að kynna sér vel húsnæði Hafnarborgar áður en tillögur eru sendar inn. Listráð Hafnarborgar, ásamt forstöðumanni, metur innsendar tillögur og velur úr hópi þeirra tillögur til frekari skoðunar í annarri umferð.

2. hluti

Sýningarstjórum, sem eiga þær tillögur sem valdar eru til frekari skoðunar, verður boðið að kynna hugmyndir sínar og senda inn ítarefni, s.s. sýningarskrár, myndefni eða myndbönd, auk þess sem vinna þarf að raunhæfri fjárhagsáætlun fyrir verkefnið. Reiknað er með að sýningin og vinnan við hana falli að fjárhagsáætlun safnsins, ellegar verði leitað leiða til að fá sérstakan stuðning við verkefnið.

Við mat á tillögum verða eftirfarandi atriði skoðuð:

  • Val á listamönnum.
  • Hvort sýningin kynni nýstárlega sýn á myndlist, t.d. innihald og/eða miðla.
  • Hvort um sé að ræða ný eða eldri verk eða jafnvel blöndu hvors tveggja.
  • Hvort sýningin hafi sérstaka skírskotun til Hafnarborgar, þ.e. safneignar, umhverfis, bæjarlífs o.s.frv.
  • Hvort sýningin nýti sýningarrými Hafnarborgar á frumlegan hátt.
  • Ferill sýningarstjóra (sérstaklega er leitað eftir sýningarstjórum sem ekki eiga langan feril að baki).
  • Tillögur að dagskrá í tengslum við sýninguna (leiðsögn, málþing, námskeið o.s.frv.).
  • Tillögur að hugsanlegri útgáfu.
  • Að kostnaður við verkefnið sé innan viðráðanlegra marka (nánari útfærsla kostnaðar fer fram í síðari hluta ferlisins).

Teikningar af sölum Hafnarborgar má finna hér. Þær eru ætlaðar til viðmiðunar við undirbúning tillagna en ekki er þess krafist að sýningar séu hannaðar nákvæmlega inn í rýmið.


Allar tillögur skulu sendar á netfangið [email protected], merktar „Haustsýning 2022“. Í kjölfarið verður send staðfesting á því að tillagan hafi verið móttekin en bent er á að hafa skal samband í síma 585 5790, berist sú staðfesting ekki. Þá verða allir umsækjendur upplýstir um það hvort tillaga þeirra hafi hlotið brautargengi eður ei, er líða tekur á ferlið. Allar niðurstöður verða sendar með tölvupósti.

Nánari upplýsingar veitir skrifstofa Hafnarborgar í síma 585 5790.