Hellisgerði

Hellisgerði í Hafnarfirði er einn elsti opinberi skrúðgarður á Íslandi. Hann var fyrst opnaður árið 1923 og var þá ætlað að vera blóma og skemmtigarður í ört vaxandi bæ. Á sýningunni er mannlífið í garðinum skoðað í spegli tímans, sjónum beint að gróðri og stemningu á ólíkum tímum. Sýndar eru teikningar og uppdrættir, ljósmyndir, kvikmyndir og gripir sem tengjast garðinum.

Segja má að Hellisgerði hafi verið fyrsti íslenski landslagsgarðurinn sem felldur var að náttúrulegu umhverfi og mótaður samkvæmt því. Við hönnun og skipulagningu garðsins hefur verið haft að leiðarljósi að varðveita upprunalegt landslag svæðisins eins og kostur er og hefur þá sérstaklega verið hugað að því að hraunið fái notið sín. Auk þess að vera ætlað að varðveita óraskaðar minjar um hið sérkennilega bæjarstæði Hafnarfjarðar var garðurinn ekki síst hugsaður sem staður fyrir bæjarbúa að njóta ánægju og hvíldar í tómstundum. Á níutíu ára tímabili hafa bæjarbúar og aðrir notið þar fagurs umhverfis og viðburða af ýmsu tagi og þó lífshættir hafi breyst með árunum eiga upphafleg markmið garðsins um að hlúa að umhverfinu og rækta mannlífið enn fullt erindi við samtímann. Sýningarstjórar eru Berglind Guðmundsdóttir landslagsarkitekt og Magnea Guðmundsdóttir arkitekt. Sýningin er unnin í samstarfi við skipulags- og byggingarsvið Hafnarfjarðarbæjar.

Samhliða opnuninni kemur út blað þar sem fjallað er um Hellisgerði frá ýmsum sjónarhornum, saga garðsins er rifjuð upp og birt minningabrot frá ýmsum tímum auk þess sem rifjuð er upp saga eldhuganna í málfundafélaginu Magna sem lögðu drög að garðinum.

Boðið verður upp á fjölbreytta dagskrá í tengslum við sýninguna í samstarfi við ýmsa aðila, þar á meðal Hollvinafélag Hellisgerðis. Má þar nefna leiðsagnir og samtal við sýningarstjóra, gönguferðir um Hellisgerði þar sem sagt er frá gróðri, listaverkum og skipulagi garðsins auk þess sem Hafnarborg stendur fyrir myndlistarnámskeiði fyrir börn þar sem meðal annars verður unnið út frá garðinum.