Sönghátíð í Hafnarborg 1. – 9. júlí 2017

Sönghátíð í Hafnarborg er ný hátíð sem verður haldin í fyrsta skipti dagana 1. – 9. júlí 2017 í Hafnarfirði. Markmið hátíðarinnar er að heiðra klassíska söngtónlist og auka almenna þekkingu á list raddarinnar með tónleikum og námskeiðahaldi.

Á meðal flytjenda eru Kristinn Sigmundsson bassi, Dísella Lárusdóttir sópran, Guðrún Jóhanna Ólafsdóttir mezzósópran, Þóra Einarsdóttir sópran, Hallveig Rúnarsdóttir sópran, Guja Sandholt mezzósópran, píanóleikararnir Anna Guðný Guðmundsdóttir, Hrönn Þráinsdóttir og Matthildur Anna Gísladóttir og gítarleikarinn Francisco Javier Jáuregui.

Allt söngáhugafólk ætti að finna eitthvað við sitt hæfi á Sönghátíð í Hafnarborg, bæði sem hlustendur og þátttakendur. Auk fimm söngtónleika býður Sönghátíð í Hafnarborg upp á master class með Þóru Einarsdóttur sem endar á tónleikum, söngnámskeið fyrir áhugafólk með Guðrúnu Jóhönnu, tónlistarnámskeið fyrir 6-12 ára börn sem Þórdís Heiða Kristjánsdóttir og Hildur Guðný Guðmundsdóttir leiða og jóga fyrir söngvara undir stjórn Guju Sandholt. Þar að auki mun Dúó Atlantica flytja ókeypis tónleika fyrir vistfólk á Hrafnistu í Hafnarfirði. Stofnandi og listrænn stjórnandi hátíðarinnar er mezzósópransöngkonan Guðrún Jóhanna Ólafsdóttir.

Skráning á námskeiðin er hafin í gegnum netfangið hafnarborg@hafnarfjordur.is  Miðasala fer fram á tix.is  Allar frekari upplýsingar má finna á vefsíðu hátíðarinnar www.songhatid.is