Astrid Kruse Jensen heimsótti Ísland fyrir 15 árum síðan og vann hér ljósmyndaseríur sem síðan hafa borið hróður hennar víða. Í verkum sínum fæst Astrid við myrkrið, tómleikann og minnið. Tæknileg framkvæmd bæði myndatöku og framköllunar er lykilatriði í myndsköpun Astrid. Í myndum þeim sem teknar voru á Íslandi leitast hún við að fanga myrkrið: þöglar stillur í einmanalegu vetrarlandslagi. Í seríunni Fragments of Remembrence lætur hún svo efnafræðina skapa tilfinningu fyrir óljósum minningarbrotum úr eigin fjölskyldu með því að framkalla gamlar filmur úr eigu fjölskyldunnar.
Astrid Kruse Jensen er fædd árið 1975 í Árósum. Hún stundaði nám í Amsterdam og Glasgow og útskrifaðist frá Glasgow School of Art árið 2002. Árið 2003 dvaldi Astrid í gestavinnustofu Hafnarborgar og vann að ljósmyndaseríunni Hidden Places, sem sýnd var í kaffistofu Hafnarborgar árið 2004, og í kjölfarið eignaðist Hafnarborg átta ljósmyndir eftir hana. Á sama tíma voru verk hennar einnig sýnd í Gallerí Skugga sem þá var rekið á Hverfisgötu í Reykjavík. Síðan hefur Astrid haslað sér völl sem listrænn ljósmyndari en hún hefur sýnt víða um heim og unnið til verðlauna fyrir verk sín. Á sýningunni nú eru verkin úr safneign Hafnarborgar dregin fram en einnig eru sýnd verk úr hinni nýju seríu, Fragments of Remembrence.
Sýningin er hluti af dagskrá Ljósmyndahátíðar Íslands 2018.