Á sýningunni leiðir Þórir Gunnarsson, sem gengur einnig undir listamannsnafninu Listapúkinn, okkur inn í myndheim sem er jafnt persónulegur og býr yfir mikilli leikgleði. Þórir sækir innblástur hvaðanæva úr nærumhverfi sínu – svo sem úr strætó- og hlaupaferðum eða náttúrunni – en Þórir hefur óþrjótandi áhuga á íþróttum og er mikill stuðningsmaður þeirra, auk þess sem nefna má að hann tekur sjálfur reglulega þátt í maraþonhlaupum.
Í verkum Þóris má greina eldmóð og lífsneista sem sprettur af vinnusemi, elju og mikilli sköpunarþörf. Myndlistin hefur aftur fylgt honum frá barnæsku og hann vinnur einkum með teikningu og vatnsliti, þar sem hann nálgast miðlana af forvitni og innsæi. Þá hafa teikningar sem hann vinnur á ferðalögum sínum í strætó orðið uppspretta fjölbreyttra verka, þar sem athugult auga hans fangar bæði daglegt líf og síbreytileg augnablik. Í þessum verkum sameinast rannsókn og upplifun, þar sem lag eftir lag af efni og hugmyndum skapar nýjan veruleika.
Þórir starfar hjá Listvinnzlunni sem listamaður, ráðgjafi og aðstoðarkennari og hefur lagt áherslu á að auka aðgengi fatlaðs fólks að menningu og listnámi. Fyrir það frumkvöðlastarf hlaut hann Múrbrjót Þroskahjálpar árið 2021. Hann hefur einnig verið útnefndur bæjarlistamaður Mosfellsbæjar og sýnt verk sín víða, meðal annars í Norræna húsinu, Gerðarsafni og í Listasafni Reykjavíkur.
Þórir er ekki aðeins myndlistarmaður heldur einnig menningarfrömuður og tónlistarunnandi sem nýtur þess að kynnast fólki og vera í skapandi samfélagi. Með sýningunni býður hann áhorfendum að finna kraftinn sem knýr hann áfram – lífsgleðina, hreyfinguna, sköpunina og samtalið við aðra – líkt og neisti sem lýstur niður og kveikir nýjar hugmyndir.
Sýningin er sett upp í samstarfi við List án landamæra en Þórir Gunnarsson er listamanneskja hátíðarinnar 2025.