Það sem fyrir augu ber – leiðsögn og sýningarlok

Síðasti sýningardagur sýningarinnar Það sem fyrir augu ber, þar sem sjá má verk eftir hafnfirska gullsmiðinn og listamanninn Gunnar Hjaltason, verður sunnudaginn 21. mars næstkomandi. Þá verður boðið upp á leiðsögn um sýninguna kl. 14 þar sem Unnur Mjöll Leifsdóttir, starfandi forstöðumaður Hafnarborgar, mun segja frá sýningunni. Með henni verður Sigurjón Gunnarsson, sonur listamannsins, sem mun veita gestum innsýn í líf og starf föður síns.

Gunnar Hjaltason (1920-1999) starfaði sem gullsmiður í Hafnarfirði um árabil en ástríða hans lá í myndlist. Verk hans voru sýnd víða, allt frá Eden í Hveragerði til Bogasals Þjóðminjasafnsins. Hann málaði með olíu, akrýl og vatnslitum en á þessari sýningu verða grafíkverk hans í forgrunni, enda fjölmörg slík verk varðveitt í safni Hafnarborgar. Myndefnið er landslag, bæjarlandslag Hafnarfjarðar og náttúra Íslands.

Grímuskylda er á viðburðinum fyrir gesti fædda árið 2005 og fyrr, auk þess sem tveggja metra fjarlægð skal höfð milli óskyldra aðila.