Laugardaginn 29. nóvember kl. 13 mun Eggert Pétursson, myndlistarmaður, taka á móti gestum og segja frá verkum sínum á nýopnaðri sýningu hans, Roða, ásamt Aldísi Arnardóttur, sýningarstjóra og forstöðumanni Hafnarborgar. Á sýningunni má sjá bæði ný málverk og grafíkverk eftir listamanninn, sem hefur um árabil vakið athygli fyrir einstakan og ástríðufullan áhuga á íslenskri náttúru og þá sérstaklega flóru landsins.
Í Sverrissal Hafnarborgar sýnir Eggert málverk sem hann hefur unnið sérstaklega fyrir sýninguna en þar heldur hann áfram rannsókn sinni á íslenskri náttúru og beinir nú sjónum sínum upp á við – að fjallagróðri og opnum himni. Smæstu jurtir verða að stórbrotnu landslagi þar sem gróður og yfirborð jarðar breytast í fínstillta myndbyggingu sem endurspeglar tíma, birtu og breytileika. Einnig er sýnd sería nýrra grafíkverka, unnin í tengslum við væntanlega þýðingu á Paradís úr Gleðileiknum guðdómlega eftir Dante, þar sem andlegur og táknrænn heimur kallast á við jarðbundna sýn listamannsins.
Eggert Pétursson (f. 1956) býr og starfar í Reykjavík. Hann nam við Myndlista- og handíðaskóla Íslands og Jan van Eyck Academie í Maastricht. Verk hans hafa meðal annars verið sýnd í Nýlistasafninu, Listasafni Reykjavíkur, Hafnarborg, Nordatlantensbrygge í Kaupmannahöfn og Pori Art Museum í Finnlandi. Jafnframt má nefna að Eggert hlaut önnur verðlaun Carnegie Art Award 2006 (Osló, Stokkhólmur, Helsinki, Reykjavík, Kaupmannahöfn og Nice). Þá myndskreytti Eggert vinsæla útgáfu af Íslenskri flóru eftir Ágúst H. Bjarnason sem kom fyrst út árið 1983. Eggert starfar með i8 gallerí í Reykjavík þar sem hann hefur oftsinnis sýnt. Ýmsar bækur tileinkaðar verkum hans hafa einnig verið gefnar út.
Aðgangur ókeypis – verið öll velkomin.