Með augum Minksins – Hönnun, ferli, framleiðsla

Sýningin Með augum Minksins fjallar um hönnunarferlið frá hugmynd til tilbúinnar vöru. Á sýningunni, í Sverrissal, er varpað ljósi á hönnun og þróun ferðavagnsins Minksins sem dæmi um íslenska hönnun og framleiðslu þar sem hönnunarhugsun er fylgt frá upphafi til enda. Hugmyndin að útliti og gerð Minksins er sótt allt aftur til fjórða áratugarins, til bandaríska ferðavagnsins  „The Teardrop Trailer“. Hugmyndina fengu þeir Ólafur Gunnar Sverrisson og Kolbeinn Björnsson fyrir um fjórum árum. Í samvinnu við sænsku hönnunarstofuna Jordi Hans Design var hugmyndin þróuð áfram og unnin þar af hönnuðinum Kaesar Amin. Hönnun innviða var í höndum Emilíu Borgþórsdóttur en heildarhönnun stýrði Ólafur Gunnar Sverrisson.

Á sýningunni má finna allt frá frumskissum yfir í teikningar af lokafrágangi, efnisvali og tæknilegum lausnum. Þar má glöggt sjá hvernig hugsa þarf um hvert smáatriði í hönnunarferlinu og gefa lausnum tíma til þróunnar. Mikilvægur þáttur í hönnun Minksins er þverfagleg samvinna og samtal fagfólks á ólíkum sviðum þar sem hver og einn leggur sitt til hugmyndavinnunnar og heildarferlisins. Annað mikilvægt atriði sem hefur átt leiðandi þátt í útliti, gerð og hugmyndafræði Minksins eru tengsl mannsins og návígi hans við náttúruna. Þannig vísar nafn sýningarinnar í hringlaga augu á hlið ferðavagnsins og það hvernig ferðalangurinn getur skoðað afmarkað sjónarhorn á íslenska náttúru – séð íslenska náttúru með augum Minksins. Augljóst er á fjölmörgum myndum ferðamanna sem dvalið hafa í Minknum að þessi sérkenni heilla. Sýningin er sett upp í tengslum við farandsýninguna Japanese Design Today á efri hæð safnsins.

Sýningarstjórar og hönnuðir sýningar eru: Elísabet V. Ingvarsdóttir og Magnús Ingvar Ágústsson.