Líkt og undanfarin ár gefst sýningarstjórum tækifæri til að senda inn tillögur að haustsýningu næsta árs í Hafnarborg. Haustsýningaröðin hóf göngu sína árið 2011 en hingað til hafa fjórtán sýningar verið valdar úr miklum fjölda innsendra tillagna eftir sýningarstjóra með ólíkan bakgrunn og reynslu. Þá var væntanleg haustsýning Hafnarborgar, Óþekkt alúð, í sýningarstjórn Þórhildar Tinnu Sigurðardóttur, valin með sama hætti úr þeim tillögum sem bárust á síðasta ári en sýningin verður opnuð 29. ágúst næstkomandi.

Markmiðið með því að óska eftir innsendum tillögum er að fá tækifæri til að velja til samstarfs sýningarstjóra eða sýningarstjórateymi, sem leggur fram áhugaverða sýningartillögu, auk þess að vera vettvangur fyrir upprennandi sýningarstjóra til að koma hugmyndum sínum á framfæri. Eru sýningarstjórar með stuttan feril að baki því sérstaklega hvattir til að sækja um. Það hefur enda sýnt sig að fyllsta ástæða er til að halda úti slíku verkefni en út frá því hafa orðið til fjölbreyttar sýningar, sem vakið hafa athygli og fengið góða aðsókn.

Óskað er eftir hugmyndum að samsýningum þar sem viðfangsefni, vinnuaðferð og/eða aðrar hugmyndir tengja verk listamanna (allt að átta talsins) en einnig koma til greina sýningar sem fela í sér greiningu eða sérstaka sýn á verk ákveðins listamanns. Jafnt koma til greina sýningar á verkum samtímalistamanna og sýningar sem fela í sér sögulega greiningu. Þá er það listráð Hafnarborgar sem fer yfir umsóknir og velur vinningstillöguna í samráði við forstöðumann.

Vinsamlegast athugið að frestur til að skila inn tillögum hefur verið framlengdur til miðnættis sunnudaginn 8. september næstkomandi.

Aðeins er tekið við tillögum í tölvupósti á netfangið [email protected] (sjá nánar í lokin).

Umsóknarferli

Umsóknarferlið er tvískipt og eru umsækjendur vinsamlegast beðnir um að kynna sér ferlið vel með því að fara yfir þau atriði sem talin eru hér fyrir neðan.

1. hluti

Í fyrri umferð er óskað eftir eftirfarandi upplýsingum:

• Lýsingu á verkefninu þar sem lögð er áhersla á hugmyndina að baki sýningunni (hámark 1000 orð).
• Ferilskrá(m) sýningarstjóra.
• Stuttum ferilskrám listamanns eða -manna (allt að átta talsins), auk annarra sem lagt er til að verði hluti af sýningarverkefninu.

Gefa skal eins nákvæma lýsingu og unnt er, innan uppgefinna marka um orðafjölda. Einnig er leyfilegt er að láta myndefni, sem er lýsandi fyrir verkefnið, fylgja tillögunni, þó ekki séu gerðar kröfur um slíkt í fyrri umferð. Þá er umsækjendum bent á að kynna sér vel húsnæði Hafnarborgar áður en tillögur eru sendar inn. Listráð Hafnarborgar, ásamt forstöðumanni, metur innsendar tillögur og velur verkefni til frekari skoðunar í annarri umferð.

2. hluti

Þeim sýningarstjórum sem eiga þær tillögur sem valdar eru til frekari skoðunar verður boðið að kynna hugmyndir sínar og senda inn ítarefni, s.s. sýningarskrár, myndefni eða myndbönd, auk þess sem vinna þarf að raunhæfri kostnaðaráætlun fyrir verkefnið. Reiknað er með að sýningin og vinnan við hana falli að fjárhagsáætlun safnsins, ella verði leitað leiða til að fá sérstakan stuðning við verkefnið.

Við mat á tillögum verða eftirfarandi atriði skoðuð:

• Val á listamönnum.
• Hvort sýningin kynni nýstárlega sýn á myndlist, t.d. innihald og/eða miðla.
• Hvort um sé að ræða ný eða eldri verk eða jafnvel blöndu hvors tveggja.
• Hvort sýningin hafi sérstaka skírskotun til Hafnarborgar, svo sem safneignar, umhverfis, nærsamfélags o.s.frv.
• Hvort sýningin nýti sýningarrými Hafnarborgar á frumlegan hátt.
• Ferill sýningarstjóra.
• Tillögur að dagskrá í tengslum við sýninguna (leiðsögn, málþing, námskeið o.s.frv.).
• Tillögur að hugsanlegri útgáfu.
• Að kostnaður við verkefnið sé innan viðráðanlegra marka (nánari útfærsla kostnaðar fer fram í síðari hluta ferlisins).

Grunnmynd af sölum Hafnarborgar má finna hér. Eru teikningarnar ætlaðar til viðmiðunar við undirbúning tillagna en þess er ekki krafist að þær séu hannaðar nákvæmlega inn í rýmið.

Allar tillögur skulu sendar á netfangið [email protected], merktar „Haustsýning 2025“. Í kjölfarið verður send staðfesting á því að tillagan hafi verið móttekin en bent er á að hafa samband í síma 585 5790, berist sú staðfesting ekki. Þá verða allir umsækjendur upplýstir um það hvort tillaga þeirra hafi hlotið brautargengi eður ei. Allar niðurstöður verða sendar með tölvupósti.

Nánari upplýsingar veitir skrifstofa Hafnarborgar í síma 585 5790.

Sönghátíð í Hafnarborg hefur frá upphafi staðið fyrir master class námskeiði fyrir lengra komna söngnemendur og söngvara. Í ár stendur námskeiðið yfir dagana 24. til 27. júní og fyllir tónlistin því húsakynni Hafnarborgar á meðan. Námskeiðið er haldið í aðalsal safnsins frá morgni til seinniparts dags, svo gestir sem heimsækja sýningar safnsins fá að njóta söngs þátttakenda í leiðinni. Námskeiðinu lýkur svo með tónleikum nemenda sem fara fram fimmtudaginn 27. júní kl. 20 sem hluti af dagskrá Sönghátíðar. Leiðbeinandi námskeiðsins að þessu sinni er hin ástsæla sópransöngkona Sigrún Hjálmtýsdóttir (Diddú) en henni til fulltingis er píanóleikarinn Helga Bryndís Magnúsdóttir, sem mun einnig koma fram með nemendum á tónleikunum.

Nánari upplýsingar um Sönghátíð í Hafnarborg má finna á heimasíðu hátíðarinnar, www.songhatid.is.

Við vekjum athygli á því að um þessar mundir er unnið að viðhaldi á útveggjum safnsins. Þá verður hluti þeirra slípaður og filtaður og því næst verða þeir málaðir, eftir því sem veður leyfir. Við biðjumst velvirðingar á því ónæði sem þetta kann að valda.

Safnið verður opið eins og venjulega á meðan framkvæmdunum stendur.

Föstudaginn 31. maí kl. 17 bjóðum við ykkur hjartanlega velkomin á opnun sýningar Guðnýjar Guðmundsdóttur, Kassíópeiu, í Sverrissal Hafnarborgar. Á sýningunni getur að líta mestmegnis ný og nýleg verk eftir listakonuna, sem hún vinnur á pappír og í leir, auk vídeóverka. Þá speglar hún sjálfa sig í verkunum og dregur fram pælingar um sært egó, sjálfsupphafningu og sjálfselsku, þar sem innblástur er sóttur í gríska goðafræði.

Áhorfandinn stígur inn í óræðan heim, þar sem finna má titla á ólíkum tungumálum (þýsku, frönsku og ensku), áletranir og vísanir í verur og fyrirbæri úr hinum klassíska heimi. Þá færa verkin okkur fram og til baka í tíma og fá okkur til að velta vöngum yfir innri tengingum eða sambandi, þar sem þau mynda eins konar stjörnumerki eða þyrpingu sem býður ef til vill upp á fleiri spurningar en svör.

Guðný Guðmundsdóttir (f. 1970) útskrifaðist frá Myndlista- og handíðaskóla Íslands árið 1993, Hochschule für bildende Künste Hamburg árið 2001 og hefur starfað við myndlist síðan. Í listsköpun sinni vinnur hún með miðla eins og teikningu, málverk, klippimyndir, skúlptúr og ljósmyndun. Guðný býr og starfar í Berlín.

Hafnarborg býður upp á myndlistar- og tónlistarnámskeið fyrir börn á aldrinum 6–12 ára í sumar, líkt og fyrri ár. Farið verður í rannsóknarleiðangra og undirstöðuatriði myndlistar kynnt í gegnum rannsóknir á umhverfinu, sýningar í safninu og skapandi vinnu. Unnin verða verkefni í fjölbreytta miðla – teiknað, málað og mótað – með það að markmiði að þjálfa sjónræna athygli, örva skapandi hugsun og persónulega tjáningu barnanna.

Í boði eru tvö 5 daga námskeið og eitt 4 daga námskeið fyrir aldurshópana 6–9 ára og 10–12 ára. Þá verður námskeiðið sem hefst þann 24. júní með tónlistar- og söngívafi í tengslum við Sönghátíð í Hafnarborg. Lýkur því námskeiði með þátttöku barnanna í fjölskyldutónleikum á Sönghátíð föstudaginn 28. júní kl. 17.

Myndlistarkennari er Þóra Breiðfjörð og tónlistarkennari er Björg Ragnheiður Pálsdóttir.

Boðið verður upp á eftirfarandi sumarnámskeið:

10. júní–14. júní
6–9 ára: kl. 9:00–12:00
10–12 ára: kl. 13:00–16:00

18. júní–21. júní
6–9 ára: kl. 9:00–12:00
10–12 ára: kl. 13:00–16:00

24. júní–28. júní
6–9 ára: kl. 9:00–12:00
10–12 ára: kl. 13:00–16:00

Námskeiðsgjald fyrir 5 daga er 15.860 krónur og gjald fyrir 4 daga er 12.690. Foreldrar og forsjáraðilar eru vinsamlegast beðin að láta vita ef barn er með sérþarfir sem taka þarf tillit til.

Athugið að fjöldi þátttakenda í sumarnámskeiðunum er takmarkaður.

Skráning fer fram í gegnum frístundavefinn Völu. Frekari upplýsingar um námskeiðin eru veittar í síma 585 5790 eða í gegnum netfangið [email protected].

Nú líður senn að páskum og sendir starfsfólk Hafnarborgar vinum og velunnurum safnsins hugheilar óskir um gleðilega hátíð. Þá vekjum við athygli á opnunartímanum hjá okkur um páskana:

Skírdagur 28. mars
Opið kl. 12–17

Föstudagurinn langi 29. mars
Lokað

Laugardagur 30. mars
Opið kl. 12–17

Páskadagur 31. mars
Lokað

Annar í páskum 1. apríl
Opið kl. 12–17

Aðgangur ókeypis – verið öll velkomin.

Starfsfólk Hafnarborgar óskar Andrési Þór Gunnlaugssyni hjartanlega til hamingju með útnefninguna sem „flytjandi ársins“ í flokki djasstónlistar á Íslensku tónlistarverðlaununum 2024.

Andrés Þór er meðal annars stofnandi og listrænn stjórnandi tónleikaraðarinnar Síðdegistóna í Hafnarborg, sem hóf göngu sína í safninu árið 2020, en þar hafa stigið á stokk fjölmargar af okkar björtustu stjörnum á íslensku djasssenunni, oft ásamt Andrési sjálfum á gítar.

Þá notum við tækifærið til þess að óska öllum þeim sem tilnefnd voru til Íslensku tónlistarverðlaunanna til hamingju en það gladdi okkur mjög að sjá mörg úr hópi þeirra sem komið hafa fram í Hafnarborg á síðustu árum á meðal tilnefndra.

Húrra fyrir öllu okkar frábæra tónlistarfólki!

Kærleikskúlan í ár, HEIMUR, eftir Guðjón Ketilsson er nú fáanleg í safnbúð Hafnarborgar. Kúlan er framleidd í takmörkuðu upplagi en síðustu ár hefur kúlan jafnan selst upp áður en sölutímabilinu lýkur. Allur ágóði af sölunni rennur til starfs í þágu fatlaðra barna og ungmenna.

Mannréttindayfirlýsing Sameinuðu þjóðanna hjúpar að þessu sinni Kærleikskúluna. Þunn og viðkvæm glerkúlan er undirlag og sögusvið hins mannlega sannleika, harms og áreitis sem kallar á sammannlegan sáttmála um að halda utan um mennskuna og gildi hennar gagnvart fáum en þó valdamiklum öflum. Mannréttindayfirlýsingin er rituð með bláum lit sem er ætlað að minna á jarðkúluna okkar, en vatn nemur 70% af heildaryfirborði hennar, sem er rétt rúmlega heildarmagn vatns í mannslíkamanum.

Verður kúla þessi til sem listgripur þegar 75 ár eru liðin frá því að sáttmálinn var staðfestur í því markmiði að stuðla að friðsamlegum samskiptum þjóða. Yfirlýsingin kveður á um mannréttindi sem allir eiga tilkall til óháð kynþætti, litarhætti, kynferði, tungu, trú, skoðunum, þjóðerni, uppruna, eignum, ætterni eða öðrum aðstæðum. Sköpun Kærleikskúlunnar á sér því uppsprettu í mannlegri samhygð, náungakærleika og von um friðsamlegri samskipti þjóða.

Guðjón Ketilsson (f. 1956) er einn fremsti og afkastamesti listamaður landsins en hann hlaut Íslensku myndlistarverðlaunin árið 2020. Guðjón hefur haldið yfir þrjátíu einkasýningar, þar á meðal yfirlitssýninguna Jæja á Kjarvalsstöðum árið 2022, auk þess að hafa tekið þátt í fjölda samsýninga víða um heim. Verk hans er að finna í öllum helstu listasöfnum á Íslandi og í opinberu rými hérlendis og á Norðurlöndunum. Guðjón vinnur að jöfnu að gerð teikninga og skúlptúra þar sem handverkið er í forgrunni. Verk hans rýna í mannlegt eðli, líkamann og hversdagslegt umhverfi þar sem kunnuglegir hlutir, form, orð eða ritaður texti eru dregin fram í nýju og gjarnan óvæntu samhengi.

Kærleikskúlan verður til sölu í safnbúð Hafnarborgar frá 7. til 21. desember, á meðan birgðir endast.

Undanfarnar vikur hafa staðið yfir talsverðar framkvæmdir í aðalsal Hafnarborgar þar sem unnið hefur verið að því að setja upp nýjan ljósabúnað, auk þess sem loftið í salnum hefur verið málað.

Þá gleður það okkur að bjóða gesti aftur velkomna á sýninguna Landslag fyrir útvalda sem við opnum að nýju í endurbættum sal frá og með deginum í dag, laugardaginn 2. desember.

Listamennirnir sem taka þátt í sýningunni eru Arna Beth, Fritz Hendrik IV, Margrét Helga Sesseljudóttir, Sól Hansdóttir, Vikram Pradhan, Bíbí Söring og Þrándur Jóhannsson, auk þess sem sýnd eru verk eftir Eirík Smith, Patrick Huse og Sigrid Valtingojer úr safneign Hafnarborgar og Listasafns ASÍ.

Sýningarstjórar eru Eva Lín Vilhjálmsdóttir og Odda Júlía Snorradóttir.

Sýningin stendur yfir til 30. desember næstkomandi.

Ókeypis aðgangur – verið öll velkomin.