Heildarsafn

Safneign Hafnarborgar telur nú í heild rúmlega 1.500 listaverk. Stofnendur Hafnarborgar, Sverrir Magnússon lyfsali og kona hans Ingibjörg Sigurjónsdóttir, lögðu grunninn að safninu með listaverkagjöf til Hafnarfjarðarbæjar árið 1983. Þá færði Eiríkur Smith safninu veglega listaverkagjöf árið 1990 og einnig gáfu þeir Elías B. Halldórsson og Gunnar Hjaltason safninu fjölda grafíklistaverka sinna. Fleiri listamenn og einstaklingar hafa fært safninu listaverk að gjöf en einnig eru keypt verk til safnsins í samræmi við söfnunarstefnu Hafnarborgar, eftir því sem fjárveitingar leyfa. Reglulega eru haldnar sýningar á verkum í safneigninni.

Stofngjöf

Listaverkagjöf þeirra Sverris og Ingibjargar, sem myndaði grunninn að safni Hafnarborgar og kölluð er stofngjöf, samanstendur af tæplega 200 verkum eftir marga þekktustu frumherja íslenskrar listasögu á borð við Kjarval, Nínu Tryggvadóttur, Jóhann Briem og Júlíönu Sveinsdóttur. Sverrir byrjaði sjálfur að safna myndlist á kreppuárunum um 1930, þegar hann eignaðist vatnslitamynd eftir Ólaf Túbals. Þannig hófst söfnunin en í áranna rás bættist smátt og smátt í safnið, þar sem Sverrir fylgdist vel með sýningum og keypti jafnt og þétt fleiri verk. Verkin í stofngjöfinni eru flest hefðbundnar landslagsmyndir, bæjarmyndir frá Hafnarfirði eða kyrralífsmyndir. Þá mætti segja að stofngjöfin endurspegli ágætlega borgaralegan smekk á ákveðnu tímabil í íslenskri listasögu.

Ný aðföng

Eins og áður hefur komið fram, telur safneign Hafnarborgar nú rúmlega 1.500 verk – málverk, teikningar, þrívíð verk, myndbandsverk og útilistaverk. Frá 2018 hefur listráð Hafnarborgar tvær milljónir króna í ráðstöfunarfé til kaupa á verkum – áður var ráðstöfunarfé listráðs ein milljón króna árlega – en ætíð er reynt að nýta hverja krónu vel. Yfirleitt er það forstöðumaður sem gerir tillögur að kaupum, gjarnan í tengslum við sýningar í safninu, þar sem það er talið mikilvægt að safnkosturinn endurspegli sýningarstefnu safnsins. Allar tillögur um ný aðföng, bæði kaup og gjafir, eru lagðar fyrir listráð til samþykktar áður en verk eru tekin inn í safneign Hafnarborgar.

Sarpur

Hægt er að kynna sér safneign Hafnarborgar í gegnum menningarsögulega gagnasafnið og safnmunaskrána Sarp, sem aðgengileg er almenningi á www.sarpur.is. Tekið skal fram að ekki fylgja öllum skráningum myndir af verkum, þar sem unnið er að samningum við samtök myndhöfundarrétthafa, Myndstef, varðandi rétti safna til að veita aðgang að myndum af listaverkum í safnmunaskrám, sem eru aðgengilegar almenningi, á vefnum. Í millitíðinni eru aðeins birtar myndir af listaverkum eftir þá listamenn sem veitt hafa Hafnarborg sérstaka heimild fyrir myndbirtingu í Sarpi.

 

Sarpur-logo