ShopShow

Á sýningunni Shop Show mætast umhverfismál, menning og nýsköpun á kröftugan og nýstárlegan hátt. Sýnd er norræn samtímahönnun þar sem sjónum er beint að sambandi framleiðslu og neyslu með áherslu á rekjanleika og siðferðisspurningar er varða umhverfi og náttúru. Á sýningunni eru hönnunarvörur eftir framúrskarandi hönnuði sem setja nú mark sitt á norræna samtímahönnun. Á meðal þátttakenda eru íslensku hönnuðirnir Róshildur Jónsdóttir, sem einkum er þekkt fyrir hönnun og vöruþróun leikfanga úr fiskibeinum, og hönnunarteymið Vík Prjónsdóttir sem hannar vörur úr íslenskri ull sem notið hafa mikilla vinsælda.

Markmið sýningarinnar er að efla vitund um gildi sjálfbærni í hönnun og ábyrgð neytenda þegar vara er valin. Jafnframt bendir sýningin á að hönnun nær ekki aðeins til yfirborðs hlutar og útlits heldur einnig til efnisvals, virkni og framleiðslu. Sýningin er unnin af Form Design Center í Malmö og ferðast um Norðurlöndin. Á Íslandi nýtur verkefnið stuðnings styrktarsjóðsins Viljanda. Sýningunni er fylgt úr hlaði með veglegri dagskrá þar sem viðfangsefni hennar eru krufin, meðal annars með samtölum við hönnuðina Petru Lilju, Brynhildi Pálsdóttur og Róshildi Jónsdóttur.

Sýningin er hluti af HönnunarMars 2014.