Laugardaginn 7. mars kl. 15 bjóðum við ykkur hjartanlega velkomin á opnun sýninganna Heiðvirðra einstaklinga eftir þau Weroniku Balcerak og Lukas Bury og Bergmáls eftir Rögnu Fróða.
Sýningin hverfist um langvarandi og lítt rædd samskipti milli Póllands og Íslands í gegnum tíðina – sem hófust með viðskiptum löngu áður en Pólverjar urðu stærsti hópur innflytjenda á Íslandi. Listamennirnir Weronika Balcerak og Lukas Bury vinna með miðla eins og útsaum, vídeó og málverk en með því að sameina sögulegar heimildir við hugleiðingar um lífið á líðandi stundu setja þau þessi margslungnu menningartengsl í nýtt samhengi. Sýningin varpar þannig ljósi á hvernig hversdagslegir hlutir, vinnuafl og efnahagsleg tengsl hafa haft áhrif á Ísland og Pólland í nær heila öld – og dregur upp mynd af sambandi sem hófst löngu fyrir nútímafólksflutninga og mótar bæði löndin enn þann dag í dag.
Sýningarstjórar eru Aldís Arnardóttir og Hólmar Hólm.
Lukas Bury (f. 1991) og Weronika Balcerak (f. 1996) mynda saman listamannatvíeykið Austur-Íslendinga. Nafnið hefur sögulega tilvísun til Vestur-Íslendinga, sem fluttu á sínum tíma vestur um haf og hófu nýtt líf, og kallar þannig fram spurningar um um það að koma til nýs lands, setjast að og tilheyra. Í listsköpun sinni vinna þau að myndrænum vettvangsrannsóknum sem þau miðla með innsetningum, textílverkum, vídeó og málverkum. Þá byggja þau á löngum ferlum þar sem úrvinnslan og sjálft samhengið fléttast saman og persónuleg reynsla mætir sögulegum tilvísunum. Verk þeirra einkennast af ígrunduðu efnisvali og tengingu við stað. Þá beina þau sjónum að því hvernig merking verður til í gegnum návist, endurtekningu og sameiginlegt rými.
Á sýningunni býður Ragna Fróða okkur inn í töfrandi heim mynstra, lita, forma og áferða. Heimur Rögnu er í senn kunnuglegur og framandi, nostalgískur og nýstárlegur. Upphafspunktur verkanna á sýningunni eru blekteikningar sem unnar eru í flæði og í beinu samtali milli undirmeðvitundar og handar. Í gegnum marglaga vinnuferli umbreytist hin óhefta lína frá handgerðri teikningu yfir í stafrænt útsaumuð verk sem birtast á mörkum hins óhlutbundna og fígúratífa. Verk Rögnu snúast um sköpunarferlið sjálft – samspil lita, áferða og sagna sem felast í mynstrum og táknum textílsins. Með því að sameina hefðbundið handverk og nútímatækni leitast Ragna við að víkka út mörk handverks, textílhönnunar og myndlistar.
Sýningarstjóri er Ingunn Fjóla Ingþórsdóttir.
Ragna Fróða (f. 1970) er myndlistarkona, sýningarstjóri og kennari. Ragna lærði fata- og textílhönnun í París á árunum 1992-1995 og nam síðan við textíldeild Myndlista- og handíðaskólans 1996-1998. Hún hefur starfað víða erlendis en síðastliðin fimmtán ár hefur hún búið til skiptis í New York, Berlín og Reykjavík og komið víða að verkefnum tengdum list, hönnun og menningu. Ragna var um árabil deildarstjóri textíldeildar Myndlistaskólans í Reykjavík og formaður Textílfélagsins. Undanfarin ár hefur hún verið búsett í New York þar sem hún rekur eigin vinnustofu samhliða starfi sem framkvæmdastjóri Edelkoort Inc. og New York Textile Month. Hún hefur hlotið ýmsa styrki fyrir listræna starfsemi sína og framlag til lista og menningar. Verk hennar hafa verið sýnd á Íslandi, í Evrópu og Bandaríkjunum.
Aðgangur ókeypis – sjáumst í Hafnarborg.
"*" indicates required fields
