Kærleikskúlan 2020 – fáanleg í safnbúð

ÞÖGN eftir Finnboga Pétursson er Kærleikskúla ársins 2020. Kúlan kemur í takmörkuðu upplagi en á síðasta ári seldist kúlan upp. Allur ágóði af sölunni rennur til starfs í þágu fatlaðra barna og ungmenna. ÞÖGN hefur að geyma hljóðupptöku á segulbandi en svona lýsir Finnbogi verkinu:

Kærleikskúlan geymir augnabliks þögn – eina sekúndu á metra löngu segulbandi. Upptakan er gerð á Arnarstapa sumarið 1986 milli klukkan þrjú og fjögur að nóttu. Þarna hitti ég stundina þegar allt þagnar; fuglarnir, sjórinn, vindurinn, rollurnar – flugurnar. Stundina þegar náttúran endurstillir sig, verður hljóð og nýr dagur rennur upp.

Finnbogi Pétursson hefur lengi verið í fremstu röð íslenskra listamanna og er brautryðjandi á sínu sviði myndlistarinnar. Hann hefur haldið tugi sýninga um allan heim og var fulltrúi Íslands í Feneyjatvíæringnum árið 2001. Hljóð hefur verið meginefniviðurinn í myndlistinni frá upphafi. Skynjunin er Finnboga hugleikin, hann leikur sér með mörk sjónar og heyrnar og gjarnan svo að hið ósýnilega verður sýnilegt. Í innsetningum hans, oft alltumlykjandi, verða nærstaddir að þátttakendum sem hafa áhrif á verkið á sama tíma og þeir upplifa ljós- og hljóðbylgjur á nýjan hátt.

Kærleikskúlan er blásin glerkúla, tær eins og kærleikurinn með borða í rauðum lit. Litur lífskrafts og gleði, jóla og vináttu. Eins og mennirnir eru engar tvær kúlur nákvæmlega eins en þær eru allar fallegar – hver á sinn hátt.

Kærleikskúlan verður fáanleg í safnbúð Hafnarborgar frá  3. desember til 17. desember.