Gudrun Olafsdottir portrait-sm

Sönghátíð í Hafnarborg – námskeið fyrir áhugafólk

Sönghátíð í Hafnarborg blæs til mikillar söngveislu dagana 7. – 15. júlí 2018 með sjö tónleikum og fjórum námskeiðum. Við höldum upp á aldarafmæli sjálfstæðis og fullveldis Íslands 2018 með því að bjóða upp á mikið úrval af íslenskri tónlist í alls konar mismunandi raddsamsetningum, frá gamalli þjóðlagatónlist til nýrra tónverka. En við gleymum þó ekki þeirri erlendu tónlist sem mótaði hana – og okkur – frá barokktímanum til samtímans.  Guðrún Jóhanna Ólafsdóttir er listrænn stjórnandi hátíðarinnar.

 

Söngnámskeið fyrir áhugafólk

Guðrún Jóhanna Ólafsdóttir, mezzósópran, kennir námskeið fyrir áhugafólk um söng. Farið verður í ýmislegt varðandi söngtækni, svo sem líkamsstöðu, öndun, stuðning og sérhljóðamyndun, að syngja hreint, hátt og lágt, veikt og sterkt. Markmið námskeiðsins er að nemendur nái að njóta þess að syngja af enn meira frelsi en áður. Námskeiðið er tilvalið fyrir alla þá sem hafa gaman af því að syngja og vilja ná betra valdi á röddinni, eins og t.d. þá sem syngja í kór. Ekki er nauðsynlegt að hafa lært söng áður, verið í tónlistarskóla eða að kunna að lesa nótur. Aldurslágmark er 13 ár en aldurshámark er ekkert.

Námskeiðið fer fram í Hafnarborg eftirfarandi daga:

Laugardag 7. júlí, kl. 15:00–17:00
Sunnudag 8. júlí, kl. 15:00–17:00

Námskeiðsgjald (4 klst.) er 12.000 kr.
Innifalinn er einn boðsmiði (að andvirði 3.000 kr.) á eina tónleika að eigin vali á Sönghátíð í Hafnarborg 2018. Athugið að fjöldi þátttakenda er takmarkaður.

Skráning fer fram í gegnum netfangið hafnarborg@hafnarfjordur.is.

Vinsamlegast látið upplýsingar um nafn, kennitölu, símanúmer og netfang fylgja umsókninni.

Nánari upplýsingar um skráningu í síma 585 5790 eða í gegnum netfangið info@songhatid.com.

 

Kennari

Guðrún Jóhanna Ólafsdóttir mezzósópran hefur komið fram á tónleikum vítt og breitt um Evrópu, í Suður-Ameríku, Bandaríkjunum og Afríku í tónleikasölum svo sem Henry le Boeuf Hall í Bozar í Brussel, Auditorio Nacional de Música og Teatro Real í Madrid, Glinka sal Fílharmóníunnar og Belozelsky-Belozersky höllinni í St. Pétursborg, Coliseo í Buenos Aires og Royal Festival Hall í London. Hún hefur sungið m. a. með Sinfóníuhljómsveitum Íslands, Madrídar, Barselóna, Katalóníu, La Mancha og Albacete, Camerata del Prado, St Petersburg State Symphony Orchestra og Philharmonia Orchestra í London. Hún kemur reglulega fram með Sonor Ensemble, en í þeirri sveit leika hljóðfæraleikarar úr Sinfóníuhljómsveit Spánar, undir stjórn Luis Aguirre. Guðrún er hluti af Duo Atlantica með gítarleikaranum Francisco Javier Jáuregui og Trio Aglaia með Javier og Elenu Jáuregui fiðluleikara.

Guðrún hefur sungið í óperum á Spáni, Bretlandi og Íslandi, hlutverk eins og Öskubusku, Dorabellu, Rosinu, Romeo, Prins Orlowsky, Sesto, Komponist, Dido, Ingibjörgu í Ragnheiði eftir Gunnar Þórðarson og titilhlutverkið í Stígvélaða kettinum eftir Montsalvatge í Konunglega óperuhúsinu í Madríd. Guðrún hefur frumflutt fjölda tónverka eftir íslensk og erlend tónskáld, sem mörg hver hafa verið samin sérstaklega fyrir hana. Hún hefur hlotið ýmis verðlaun í alþjóðlegum söngkeppnum, svo sem Kathleen Ferrier ljóðasöngsverðlaunin í Wigmore Hall í London, The Miriam Licette Scholarship í Konunglega óperuhúsinu Covent Garden, The Schubert Lieder Prize í Guildhall, Madeline Finden Memorial Trust Award í Royal Academy of Music, þriðju verðlaun í Concorso Vocale Internazionale di Musica Sacra í Róm, ljóðasöngsverðlaunin í hinni Alþjóðlegu söngkeppni Zamoraborgar á Spáni og verðlaun sem Besti flytjandi tónlistar eftir Rodrigo í Joaquín Rodrigo keppninni í Madríd. Hún hefur hlotið Starfslaun listamanna í eitt ár í tvígang.

Guðrún stundaði söngnám hjá Rut Magnússon í Tónlistarskólanum í Reykjavík og hjá prófessor Lauru Sarti í Guildhall School of Music and Drama í London, en þar hlaut hún meistaragráðu í söng og lauk óperudeild skólans. Guðrún var listrænn stjórnandi Kammertónleika á Kirkjubæjarklaustri í ellefu ár þar til hún stofnaði Sönghátíð í Hafnarborg, sem hún stjórnar. Söngur hennar hefur verið hljóðritaður á vegum Ríkisútvarpsins, Sjónvarpsins, BBC Radio 3, Spænska ríkisútvarpsins og Spænska ríkissjónvarpsins og var hún einn af söngvurunum sem Sjónvarpið fjallaði um í þáttaröðinni Átta raddir. Guðrún hefur sungið inn á geisladiskana Grieg-Schumann með Víkingi Heiðari Ólafssyni, Apocrypha (sem hlaut Íslensku tónlistarverðlaunin) með Nordic Affect, Iepo Oneipo Heilagur Draumur (Editor´s Choice, Gramophone Magazine) og Kom skapari með Kammerkór Suðurlands, Barn er oss fætt með Sinfóníuhljómsveit Íslands, Sigvaldi Kaldalóns: Ég lít í anda liðna tíð með Jónasi Ingimundarsyni, Tengsl Hjálmar H. Ragnarsson með Kammersveit Reykjavíkur, Mitt er þitt – íslensk og spænsk sönglög, English and Scottish Romantic Songs for Voice and Guitar (EMEC Discos) og Secretos quiero descubrir með Trio Aglaia, Awake með Sonor Ensemble og Grannmetislög og Áskell Másson (Naxos) með Caput.

Nánari upplýsingar um námskeiðin má finna á www.songhatid.is.