kulan2

Kærleikskúlan í Hafnarborg

Kærleikskúlan 2014 fæst nú í safnbúð Hafnarborgar en eins og ár hvert verður hún einungis til sölu í takmarkaðan tíma eða frá 5. til 19. desember.

Að þessu sinni er það myndlistarmaðurinn Davíð Örn Halldórsson sem hefur hannað útlit kúlunnar sem að ber nafnið Mandarína.

Styrktarfélag lamaðra og fatlaðra hefur staðið að útgáfu Kærleikskúlunnar frá árinu 2003 og eru kúlurnar því orðnar tólf talsins. Frá upphafi hafa kúlurnar fengið frábærar viðtökur landsmanna enda um að ræða einstakt safn listaverka eftir marga þekktustu listamenn okkar Íslendinga.

Listamenn Kærleikskúlunnar hafa allir gefið vinnu sína og þannig stutt dyggilega við starf í þágu fatlaðra barna og ungmenna.

Tilgangurinn með sölu Kærleikskúlunnar er að auðga líf fatlaðra barna og ungmenna, með því að efla starfsemi Reykjadals. Gera þannig fleirum mögulegt að njóta þar ævintýra tilverunnar í hópi með jafnöldrum – eignast vini og dýrmætar minningar.

Ár hvert fær Kærleikskúlan nýtt útlit – og er verkið í höndum fremstu listamanna þjóðarinnar. Í grunninn er Kærleikskúlan tær eins og kærleikurinn – með borða í rauðum lit, lit jólanna og kærleikans. Kærleikskúlan er blásin og eru því engar tvær kúlur nákvæmlega eins, en allar fallegar hver á sinn hátt. Kærleikskúlan kemur í kassa og fylgir henni bæklingur. Litir bæklinsins eru svartur og silfraður. Svartur táknar árstímann og silfraður birtuna sem er svo lýsandi fyrir boðskap jólanna.

Kuladavid

Davíð Örn Halldórsson er fæddur árið 1976. Hann útskrifaðist frá myndlistadeild Listaháskóla Íslands árið 2002 og býr og starfar í Reykjavík. Verk Davíðs Arnar eru gjarnan unnin á óhefðbundin efni og einkennast af kraftmikilli litanotkun og spennandi samruna forma og mynstra. Verkin hafa sterka skírskotun til graffítíverka en falla á einstæðan hátt að myndlistarhefðinni um leið og þau vísa sterkt í götulistina. Davíð Örn, sem er í fremstu röð íslenskra listmálara, hefur haldið fjölda sýninga hér heima og erlendis. Á meðal viðurkenninga sem hann hefur hlotið er Carnegie-styrkurinn árið 2013.

 

Mandarína

Appelsínugul kringla
sem brotnar í báta.
Börkur sem ilmar,
appelsínugulur eða grænn.
Innihaldið ríkt,
minningin um síðustu sterk.

Þessi mandarína bragðast ekki vel,
en hún brotnar í báta.

 

Eftir: Davíð Örn Halldórsson

samhljomur16strengja-milli

Hljóðön tónleikum frestað Phonemes Concert postponed

Hljóðön – Samhljómur 16 strengja tónleikum hefur verið frestað til sunnudagsins 4. janúar 2015 vegna óveðurs í dag, sunnudaginn 30. nóvember.

Strengjakvartettinn Siggi kemur fram á tónleikum tónleikaraðarinnar Hljóðön á nýju ári, sunnudaginn 4. janúar 2015 kl. 20. Þar verður hugmyndum um kvartettformið velt upp og sameining hljóðfæranna fjögurra í einn hljóðheim hugleidd. Á efnisskrá eru verk eftir Giacinto Scelsi, Naomi Pinnock og frumflutningur bæði Strengjakvartetts nr. 2 eftir Atla Heimi Sveinsson og nýs verks eftir Unu Sveinbjarnardóttur.


[ENGLISH]

Due to the storm, tonight’s Phonemes’ concert is postponed to 4th of January 2015.

‘Synthesis of 16 strings’ marks the outline of the concert of Siggi String Quartet in Hafnarborg. The works on the program give insights to different approach to the string quartet form and remarks on its soundscape. With music by composers Giacinto Scelsi, Naomi Pinnock, Atli Heimir Sveinsson and Una Sveinbjarnadóttir. The concert is a part of Phonemes, a concert series dedicated to contemporary music at Hafnarborg.

Phonemes is a concert series at Hafnarborg, dedicated to presenting music by various contemporary composers from the 20th and 21st century with a focus on small settings of chamber music. Light is shed upon subjects of contemporary music today and the artistic research of composers in the abstract world of poetry of sounds.

Vísar 3

Fréttir af innsendum tillögum að haustsýningu Hafnarborgar 2015

Hafnarborg kynnir með ánægju þá sýningarstjóra sem valdir voru til að taka þátt í 2. hluta samkeppni um haustsýningu í Hafnarborg 2015. Í haust var í fimmta sinn kallað eftir tillögum sýningarstjóra sem áhuga hafa á að vinna sýningu inn í rými safnsins og luma á áhugaverðum hugmyndum. Alls bárust 6 tillögur og hefur listráð safnsins nú valið tvær til að taka þátt í 2. hluta verkefnisins. Höfundar tillagnanna eiga að baki fjölbreyttan náms og starfsferil á sviði lista en eiga það jafnframt sameiginlegt að eiga ekki að baki mörg sýningarstjórnarleg verkefni og uppfylla þannig eitt af grunn markmiðum samkeppninnar sem er að veita tækifæri sýningarstjórum með stuttan feril að baki.

Höfundar tillagnanna tveggja eru annars vegar Aðalheiður Valgeirsdóttir listfræðingur og myndlistarmaður og Aldís Arnardóttir listfræðingur og hins vegar Jóhannes Dagsson heimspekingur og myndlistarmaður.

Listráð Hafnarborgar velur síðan þá tillögu sem lögð verður til grundvallar haustsýningunni sem opnuð verður í lok ágúst 2015.

Með verkefninu vill Hafnarborg skapa farveg fyrir áhugaverðar hugmyndir um leið og safnið verður vettvangur þar sem myndlist fær notið sín mótuð af ólíkum viðhorfum og viðfangsefnum. Verkefnið miðar að því að auka reynslu þátttakenda á sviði sýningarstjórnunar hjá opinberu safni. Leitast er við að veita aðstoð við þróun verkefnis á grundvelli reynslu og þekkingar þar sem fagleg svörun og tæknileg aðstoð er fyrir hendi.

Jórfetaður Grotesque

Rás – sýningarlok

Sunnudaginn 19. október kl. 15 tekur Ívar Valgarðsson myndlistarmaður þátt í leiðsögn og ræðir við gesti um verk sín á sýningunni Rás, sem nú stendur yfir í Hafnarborg en sýningunni lýkur nú um helgina.

Ívar Valgarðsson hefur lengi verið í framvarðarsveit íslenskra myndlistarmanna eða allt frá því hann lauk framhaldsnámi í Hollandi árið 1979. Verk hans hafa víða verið sýnd og eru í eigu margra safna og safnara bæði hér heima og erlendis. Hann á að baki á annan tug einkasýninga og fjölda samsýninga meðal annars í Listasafni Íslands og umdeilda sýningu á Kjarvalsstöðum árið 1991. Verk Ívars endurspegla áhuga hans á þeim sköpunarkrafti sem á sér stað í mótun og uppbyggingu manngerðs umhverfis. Verk hans á sýningunni Rás eru unnin inn í sýningarsal Hafnarborgar, þar sem efni og form kallast á við arkitektúr hússins.

Nú um helgina er jafnframt síðasta sýningarhelgi sýningarinnar Rásar. Sýningarstjóri er Helga Þórsdóttir, menningarfræðingur en hugmynd hennar að þessari sýningu var valin úr innsendum tillögum síðastliðið haust þegar kallað var eftir tillögum að haustsýningu 2014 í Hafnarborg. Auk verka eftir Ívar eru á sýningunni verk eftir þau Daníel Magnússon, Guðrúnu Hrönn Ragnarsdóttur, Ívar Brynjólfsson, Sólveigu Aðalsteinsdóttur og Þóru Sigurðardóttur. Nánar um sýninguna hér.

kallaðeftirtillögum2

Kallað eftir tillögum að sýningu haustið 2015

Haustsýning Hafnarborgar 2015 – Kallað eftir tillögum

Eins og undanfarin fjögur ár gefst sýningarstjórum tækifæri til að senda inn tillögur að sýningu í Hafnarborg haustið 2015. Sýningin Rás sem nú stendur yfir í safninu var valin úr athyglisverðum tillögum sem sendar voru inn á síðasta ári. Markmiðið með því að óska eftir innsendum tillögum er að fá tækifæri til að velja til samstarfs sýningarstjóra sem leggur fram áhugaverða tillögu að sýningu en jafnframt að kalla til leiks nýtt fólk. Þannig er sérstaklega hugað að því að veita tækifæri sýningarstjórum með stuttan feril að baki. Hafnarborg er eina safnið hér á landi sem opnar dyr sínar fyrir sýningarstjórum með þessum hætti. Það hefur sýnt sig að fyllsta ástæða er til að halda úti slíku verkefni, en út frá því hafa orðið til fjölbreyttar og áhugaverðar sýningar sem vakið hafa athygli og verið vel sóttar.

Óskað er eftir hugmyndum að samsýningum þar sem viðfangsefni, vinnuaðferð eða aðrar hugmyndir tengja verk listamanna en einnig koma til greina sýningar sem fela í sér greiningu eða sýn á verk ákveðins listamanns. Jafnt koma til greina sýningar á verkum samtímalistamanna og sýningar sem fela í sér sögulega greiningu.

Frestur til að skila inn tillögum rennur út mánudaginn 13. október 2014. Aðeins er tekið við efni rafrænt á netfangið haust2015@hafnarfjordur.is

Umsóknarferlið er tvískipt.

1. Hluti

Í fyrri umferð er óskað eftir eftirfarandi upplýsingum:

– Lýsing á verkefninu þar sem lögð er áhersla á hugmyndina að baki sýningunni. Hámark 1000 orð.
– Ferilskrá sýningarstjóra.
– Stuttar ferilskrár listmanna / listamanns og annarra sem lagt er til að verði hluti af sýningarverkefninu.

Gefið eins nákvæma lýsingu og unnt er en virðið uppgefinn orðafjölda. Ekki er tekið við sýningarskrám, myndefni eða dvd-diskum í fyrstu umferð. Kynnið ykkur húsnæði Hafnarborgar áður en tillögur eru sendar inn. Listráð Hafnarborgar metur innsendar tillögur ásamt forstöðumanni og velur tillögur til frekari skoðunar.

2. Hluti

Sýningarstjórum sem eiga tillögurnar sem valdar eru til frekari skoðunar er boðið að kynna hugmyndir sínar og senda inn ítarefni s.s. sýningarskrár, myndefni eða dvd-diska auk þess sem vinna þarf að raunhæfri fjárhagsáætlun fyrir sýninguna. Haustsýningin 2015 verður valin úr þessu úrtaki fyrir 1. desember 2014.

Sendið tillögur á netfangið haust2015@hafnarfjordur.is. Send verður staðfesting á því að tillagan hafi borist. Vinsamlega hafið samband ef staðfesting berst ekki. Allar niðurstöður verða sendar með tölvupósti.

Með því að kalla eftir tillögum er verið að opna fyrir nýja sýn á myndlist en jafnframt gefa nýjum sýningarstjórum tækifæri til að vinna sýningar. Reiknað er með að sýningin og vinnan við hana falli að fjárhagsáætlun safnsins eða að leitað verði leiða til að fá sérstakan stuðning við verkefnið.

Við mat á tillögum verður skoðað:

– Val á listamönnum
– Hvort sýningin kynni nýstárlega sýn á myndlist – innihald og/eða miðla
– Hvort verkin á sýningunni eru ný eða eldri verk eða blanda nýrra og eldri
– Hvort sýningin hafi sérstaka skírskotun til Hafnarborgar þ.e. safneignar, umhverfis, bæjarlífs  osfrv.
– Hvort sýningin nýti rými Hafnarborgar á frumlegan hátt
– Ferill sýningarstjóra (frekar er verið að leita eftir sýningarstjórum sem ekki eiga langan feril að baki)
– Tillögur að dagskrá í tengslum við sýninguna (leiðsögn, málþing, námskeið)
– Tillögur að hugsanlegri útgáfu
– Að kostnaður við verkefnið sé innan viðráðanlegra marka (nánari útfærsla kostnaðar er í síðari hluta ferlisins)

Teikningar af sölum Hafnarborgar eru hér fyrir neðan. Þær eru til viðmiðunar við undirbúning tillagna en ekki er ætlast til að sýningar séu hannaðar nákvæmlega inn í rýmið.

Grunnmynd af öllum sölum