Favim.com-empty-lights-magic-snow-tree-272085

Opnunartímar um jól og áramót.

23. desember    Opið frá kl. 12:00 – 17:00

24. desember     Lokað

25. desember     Lokað

26. desember     Lokað

27. desember      Lokað

28. desember    Opið frá kl. 12:00 – 17:00

29. desember    Opið frá kl. 12:00 – 17:00

30. desember    Opið frá kl. 12:00 – 17:00

31. desember     Lokað

1. janúar               Lokað

15095640_10157897137300352_3745896721029127507_n

Kærleikskúlan 2016

SÝN eftir Sigurð Árna Sigurðsson er Kærleikskúla ársins 2016. Kærleikskúlan er fáanleg í safnbúð Hafnarborgar frá 2. – 16. desember 2016.

Sameinar tvo heima með því að gata yfirborðið.
Sigurður Árni segir að á endalausu yfirborði kúlunnar séu tvær hliðar, sú ytri og hin innri. Með því að gata kúluna mætist tveir heimar. „Þegar ég vann að kærleikskúlunni og horfði á hana utan frá sá ég fyrir mér heim frá mínu sjónarhorni en um leið varð mér ljóst að inni í kúlunni er annar heimur sem horfði á minn heim frá öðru sjónarhorni. Með því að gata yfirborðið fannst mér ég sameina þessa tvo heima og nálgast það sem ég þekkti ekki áður,“ segir Sigurður Árni um hönnun sína. „Hugmynd verksins og kærleikur kúlunnar býr í gatinu. Í opinu er möguleiki á að tengjast öðrum heimi, setja sig í spor annarra og öðlast víðara sjónarhorn – nýja sýn,“ segir hann.

15178982_10157897067740352_183294555059241075_n

Verk Sigurðar gjarnan á mörkum þess áþreifanlega.
Sigurður Árni Sigurðsson er fæddur á Akureyri 1963. Hann stundaði nám í École Nationale Supérieure d‘Arts de Paris-Cergy og Institut des Hautes Études en Art Plastiques í París að loknu námi frá Myndlista- og handíðaskóla Íslands. Hann hefur búið og starfað jöfnum höndum á Íslandi og í Frakklandi og sýnt verk sín víða um heim. Verk hans eru gjarnan á mörkum þess áþreifanlega, kunnugleg form eða hlutir taka á sig nýja og óraunverulega mynd í rými ljóss og skugga – málverk verða þrívíð og skúlptúrar tvívíðir. Verk eftir Sigurð Árna er að finna í öllum helstu listasöfnum landsins sem og í opinberum og einkasöfnum í Evrópu. Af stærri opinberum verkum má nefna útilistaverkin Sólöldu við Sultartangavirkjun og L´Eloge de la Nature í bænum Loupian í Frakklandi. Sigurður Árni, sem er einn fremsti listamaður þjóðarinnar, hefur hlotið fjölda viðurkenninga á ferli sínum. Hann var fulltrúi Íslands á Feneyjatvíæringnum árið 1999 og árið 2000, þegar Reykjavík var menningarborg Evrópu, var verk eftir hann valið sem táknmynd menningarársins.

Um Kærleikskúluna
Kúlan Sýn bætist í fjölbreytt safn af Kærleikskúlum sem Styrktarfélag lamaðra og fatlaðra hefur gefið út fyrir jólin síðan 2003. Fjölmargir listamenn hafa lagt málefninu lið í gegnum árin og því eru kærleikskúlurnar fjölbreytt safn listaverka. Listamennirnir hafa allir gefið vinnu sína og þannig stutt dyggilega við starf í þágu fatlaðra barna og ungmenna.

Tilgangur
Tilgangurinn með sölu Kærleikskúlunnar er að auðga líf fatlaðra barna og ungmenna, með því að efla starfsemi Reykjadals. Gera þannig fleirum mögulegt að njóta þar ævintýra tilverunnar í hópi með jafnöldrum – eignast vini og dýrmætar minningar.

Útlit
Ár hvert fær Kærleikskúlan nýtt útlit – og er verkið í höndum fremstu listamanna þjóðarinnar. Í grunninn er Kærleikskúlan tær eins og kærleikurinn – með borða í rauðum lit, lit jólanna og kærleikans. Kærleikskúlan er blásin og eru því engar tvær kúlur nákvæmlega eins, en allar fallegar hver á sinn hátt. Kærleikskúlan kemur í kassa og fylgir henni bæklingur. Litir bæklinsins eru svartur og silfraður. Svartur táknar árstímann og silfraður birtuna sem er svo lýsandi fyrir boðskap jólanna.

Söluaðilar
Allir þeir söluaðilar sem selja Kærleikskúluna gera það án þóknunar og leggja því málefninu mikilvægt lið.

Sigurður Árni Sigurðsson hefur starfað sem myndlistarmaður bæði í Reykjavík og í Frakklandi frá því að hann lauk námi frá Institut des Hautes Études en Art Plastiques í París árið 1991. Hann hefur haldið tugi einkasýninga og tekið þátt í fjölmörgum samsýningum. Verk eftir Sigurð Árna er að finna í öllum helstu listasöfnum á Íslandi sem og í opinberum söfnum og einkasöfnum víða í Evrópu. Af stærri opinberum verkum má nefna útilistaverkið „Sólalda“ sem hann  gerði fyrir Sultartangavirkjun og var afhjúpað árið 2000, verkið “Samhengi” var sett upp í Landsbanka Íslands í Reykjavík 2005, glerverkið “Ljós í skugga” á Dvalarheimilinu Hlíð á Akureyri 2006 og útilistaverkið „L´Eloge de la Nature“ er staðsett í bænum Loupian í Suður-Frakklandi 2011. Sigurður Árni var fulltrúi Íslands á Feneyjatvíæringnum á Ítalíu árið 1999 og þegar Reykjavík var menningarborg Evrópu árið 2000 var verk eftir Sigurð Árna valið sem táknmynd menningarársins. Hann var jafnframt valinn bæjarlistamaður Akureyrar árið 2000 – 2001.

15220115_10157909573150352_4544377642942426909_n

syngjandijól2015-featureimage

Syngjandi jól 2016

Laugardaginn, 3. desember fyllist Hafnarborg af söng og hátíðaranda en þá koma saman fjölmargir kórar Hafnarfjarðar skipaðir söngfólki á öllum aldri. Syngjandi jól eru nú haldin í tuttugasta sinn og eru samstarfsverkefni skrifstofu fræðslu- og frístundarþjónustu Hafnarfjarðar, Jólaþorpsins og Hafnarborgar.

Vegna tónleikanna eru sýningar Hafnarborgar eru ekki opnar þennan dag.

Dagskráin er eftirfarandi:

09:40 – 10:00  Miðkór Lækjarskóla

10:00 – 10:20   Leikskólinn Stekkjarás

10:20 – 10:40   Leikskólinn Hvammur

10:40 – 11:00   Leikskólinn Brekkuhvammur

11:00 – 11:20    Hraunvallaskóli – leikskóli

11:20 – 11:40    Kór Áslandsskóla

11:40 – 12:00    Leikskólinn Hlíðarberg

12:00 – 12:20   Leikskólinn Álfasteinn

12:40 – 13:00   Barna- og unglingakór Hafnarfjarðarkirkju

13:00 – 13:20   Kór Öldutúnsskóla

13:20 – 13:40   Litli kór Öldutúnsskóla

13:40 – 14:00   Kvennakórinn Rósir

40:00 – 14:20   Gaflarakórinn

14:20 – 14:40    Kvennakór Hafnarfjarðar

14:40 – 15:00    Kór Ástjarnarkirkju

15:00 – 15:20    Barnakór Ástjarnarkirkju

15:20 – 15:40    Hrafnistukórinn

johannesdagsson1

Haustsýning Hafnarborgar 2017 – vinningstillaga kynnt

Nú hefur farið fram lokaval á tillögum að haustsýningu í Hafnarborg fyrir árið 2017 en það var tillaga Jóhannes Dagssonar, heimspekings og lektors við myndlistardeild Listaháskóla Íslands, sem varð fyrir valinu.

Sýningartillagan sem ber vinnutitilinn Málverk – eitthvað annað en miðill fjallar um málverkið sem  nálgun við myndræna framsetningu, burt séð frá miðli verksins og er markmið sýningarinnar að veita innsýn inní þessa þróun málverksins og nýju stöðu þess.

tilraun-ras

Jóhannes Dagsson starfar sem lektor í fræðigreinum við myndlistardeild Listaháskóla Íslands en hann hefur áður starfað sem aðjúnkt við deildina frá árinu 2013. Samhliða vinnu sinni við Listaháskóla Íslands hefur Jóhannes starfað fyrir Siðfræðistofnun Háskóla Íslands að verkefninu NERRI og verið ritsstjóri Hugar, tímarits um heimspeki.  Jóhannes starfaði sem aðstoðarkennari við heimspekideild Háskólans í Calgary, Kanada og Háskóla Íslands á árunum 2008-2011. Einnig hefur Jóhannes skrifað fjölda sýningartexta og haldið erindi um málefni tengt heimspeki listarinnar, málspeki og hugspeki.

Jóhannes lauk doktorsnámi í heimspeki (PhD) frá Háskólanum í Calgary, Kanada 2012. Áður hafði hann lagt stund á heimspeki og bókmenntir við Háskóla Íslands þar sem hann lauk meistaranámi í heimspeki 2009. Jóhannes er menntaður í myndlist frá Edinbourgh College of Art og hefur tekið þátt í sýningum hér heima og erlendis.

salurinn2015-m-texta

Síðastliðið haust kynnti Hafnarborg í sjöunda sinn, verkefni sem hafði það að markmiði að gefa sýningarstjórum kost á að senda inn tillögu að haustsýningu í Hafnarborg 2016. Höfundar tillaganna sem bárust eiga að baki ólíkan náms og starfsferil sem tengist myndlist og menningartengdum verkefnum. Það er Listráð Hafnarborgar ásamt forstöðumanni sem fer yfir umsóknir og velur vinningstillöguna ár hvert.

 

safnbud-featureimage

Safnbúð Hafnarborgar

Í safnverslun Hafnarborgar er að finna íslenskar hönnunarvörur sem hafa verið sérvaldar út frá fagurfræði, gæðum og efni þar sem náttúruleg efni og handverk fær að njóta sín. Listræn gjafavara, borðbúnaður, skartgripir, skrautmunir og fylgihlutir eru meðal þess sem finna má í versluninni.

bud-1

Meðal hönnuða og listamanna sem eiga vörur í versluninni eru Hanna Dís Whitehead, Katariina Guthwert, Habby Osk, Helicopter, Reykjavik Traiding company, Marý Marý, Thing and Things og Þórdís Baldursdóttir.

bud-3
bud-2

Safnverslunin býður einnig upp á úrval bóka og sýningarskráa sem tengjast sýningum safnsins. Þar að auki selur Hafnarborg vönduð og falleg kort og plaköt sem skarta listaverkum úr safneign.

bud-4

Safnverslunin er opin á opnunartíma Hafnarborgar, alla daga nema þriðjudaga, frá klukkan 12 – 17.

 

mynd-10

Skilaboð frá flóttamannabúðunum – Amnesty International

 

Sýrlenski flóttamaðurinn og læknirinn dr. Bashar Farahat stendur að ljósmyndasýningunni Skilaboð frá flóttamannabúðunum dagana 25. til 28. október, í samstarfi við Íslandsdeild Amnesty International. Myndirnar sýna börn sem búa í flóttamannabúðunum í Líbanon þar sem 1,1 milljón flóttamanna frá Sýrlandi dvelur við einkar erfiðar aðstæður. Setningarnar sem prýða hverja mynd eru hluti af afrakstri barnanna sem sóttu smiðju í skapandi skrifum hjá dr. Bashar Farahat í flóttamannabúðunum. Ljósmyndirnar tók Mohammed Abdullah og Shadi Jaber sá um uppsetningu.

Dr. Bashar Farahat mun opna ljósmyndasýninguna formlega þriðjudaginn 25. október kl. 17:00 í Hafnarborg – menningar- og listamiðstöð Hafnarfjarðar og stendur opnunin til kl. 19:00.

Boðið verður upp á léttar veitingar.

Einnig verður gestum sýningarinnar boðið að skrifa skilaboð til barnanna í flóttamannabúðunum í Líbanon. Íslandsdeild Amnesty International, í samstarfi við dr. Bashar Farahat, mun tryggja að skilaboðin frá Íslandi rati rétta leið.

Afnot af sýningarsal eru í boði Hafnarborgar – menningar- og listamiðstöðvar Hafnarfjarðar.

Frítt er inn á sýninguna og allir velkomnir.

„Námskeiðinu var ætlað að veita börnunum svigrúm til að segja sögu sína – sögu sem er mörkuð af stríði og skelfingu, minningum um flótta og leit að hæli og vernd. Ég vildi gefa þeim pláss til að deila sársauka sínum en einnig vonum, á sinn eigin hátt. Börnin sungu, dönsuðu, grétu, brostu, drógu upp mynd af draumum sínum og stundum skrifuðu þau skilaboð frá búðunum. Setningarnar á myndunum valdi ég af kostgæfni úr skrifum barnanna á námskeiðinu,“ segir dr. Bashar Farahat.

 

Nánar um dr. Bashar Farahat.

Dr. Bashar Farahat er 32 ára læknir frá litlu þorpi í norðurhluta Sýrlands. Hann stundaði sérfræðinám í barnalækningum í Aleppo í Sýrlandi og var á þriðja ári af fjórum í starfsnámi á spítala þegar hann var handtekinn í júlí 2012 fyrir að vera andsnúinn stjórnvöldum. Hann var sakaður um þátttöku í mótmælum, fyrir að gera grein fyrir fjölda óbreyttra borgara sem féllu í valinn af völdum stjórnvalda og fyrir að hjálpa mótmælendum á bráðabirgðaspítala. Hann var leystur úr haldi í janúar 2013 en var handtekinn á ný í apríl sama ár. Bashar Farahat sætti margvíslegum pyndingum á meðan hann var í haldi.

„Ég var handtekinn árið 2012 og var í fangelsi í 168 daga. Þeir pynduðu mig en mér fannst lífið í fangelsinu enn erfiðara. Á meðan ég var í haldi sá ég varla til sólar. Það voru um 100-120 manns í haldi í litlum klefa (5m x 6m) svo við urðum að skiptast á að liggja og  standa. Þeir fóru með mig í yfirheyrslur þar sem þeir börðu mig með hnefum og málmstöng og eitt skiptið var ég hengdur upp á höndunum. Þeir reyndu að fá mig til að viðurkenna aðild annarra. Ég gerði það ekki.“

Ein mikilvægasta stundin í lífi Bashars var þegar hann var leystur úr haldi í fyrra skiptið.

„Í fangelsinu var fjölskyldum leyft að koma í heimsókn á fimmtudögum. Einn miðvikudag var mér sagt að ég yrði leystur úr haldi daginn eftir. Vinir mínir höfðu ætlað að heimsækja mig þennan fimmtudag en mér tókst ekki að segja þeim að láta það ógert að koma. Þennan fimmtudag voru 100 manns leystir úr haldi í 5 til 10 manna hópum og ég var í síðasta hópnum. Í fangelsinu var gangur þar sem fangar stóðu frammi fyrir tvenns konar niðurstöðu, að verða leystir úr haldi eða fluttir í annað fangelsi. Ég hélt að ég yrði fluttur í annað fangelsi. Ég gekk inn ganginn og þar var maður sem stóð fyrir framan hurð og hélt á vopni. Hann spurði mig hvort ég héti Bashar og ég játti því hikandi. Hann sagði mér að það væri stór hópur af fólki fyrir utan sem hefði komið að heimsækja mig og vissi ekki að ég væri að losna úr haldi. Hann sagði: „Við skulum koma þeim á óvart.“ Hann fór með mig út og ég sá foreldra mína ásamt fimmtán vinum mínum.“

Líf hans tók stakkaskiptum vegna handtöku hans. Þegar hann var leystur úr haldi í byrjun árs 2013 fékk hann ekki að snúa aftur í starfsnámið á spítalanum þar sem yfirvöld voru búin að setja hann á svartan lista. Þremur mánuðum síðar var hann handtekinn á ný. „Ég sat á kaffihúsi með hópi af fólki þegar öryggissveit kom til að handtaka blaðakonu sem var með okkur og starfaði á ólöglegri sjónvarpsstöð. Þeir handtóku okkur öll sem vorum með henni. Klefinn okkar var jafnvel minni en hinn, hann var um 4 x 3,5m og það voru um 60 einstaklingar í klefanum. Ég var í haldi í 5 mánuði.“ Þegar Bashar var leystur úr haldi í seinna skiptið, í september 2013, voru flestir vina hans komnir úr landi og því var lausn hans ekki jafn gleðileg og sú fyrri.

Bashar var síðar kallaður í stjórnarherinn, ella yrði hann handtekinn í þriðja sinn. Hann neitaði að verða við því og flúði því til Líbanon. Þar sem hann kom ólöglega inn í landið átti hann alltaf á hættu að verða handtekinn en það var ekki það eina sem hann óttaðist. „Vinir mínir í Sýrlandi voru handteknir og ég sá þá í sjónvarpinu og heyrði þá segja að ég og annar vinur værum hryðjuverkamenn sem berðust gegn stjórnvöldum. Þeir voru líklega neyddir til þess en þetta er ástæðan fyrir því að jafnvel í Líbanon var ég hræddur um að verða tekinn af lífi. Ég hef misst alla von um að komast aftur til Sýrlands.“

Eftir fimm mánuði í Líbanon leitaði hann til Flóttamannastofnunar Sameinuðu þjóðanna sem aðstoðaði hann til að komast til Bretlands. Í mars árið 2015, eftir 16 mánaða dvöl í Líbanon, fór hann til Bretlands og þar fékk hann dvalarleyfi af mannúðarástæðum til fimm ára.

haustsýningar2014og2015

Haustsýning Hafnarborgar 2017 – Kallað eftir tillögum

Eins og undanfarin fimm ár gefst sýningarstjórum tækifæri til að senda inn tillögur að sýningu í Hafnarborg haustið 2017. Sýningin Tilraun – leir og fleira sem nú stendur yfir í safninu var valin úr athyglisverðum tillögum sem sendar voru inn á síðasta ári. Markmiðið með því að óska eftir innsendum tillögum er að fá tækifæri til að velja til samstarfs sýningarstjóra sem leggur fram áhugaverða tillögu að sýningu en jafnframt að kalla til leiks nýtt fólk. Þannig er sérstaklega hugað að því að veita tækifæri sýningarstjórum með stuttan feril að baki. Það hefur sýnt sig að fyllsta ástæða er til að halda úti slíku verkefni, en út frá því hafa orðið til fjölbreyttar og áhugaverðar sýningar sem vakið hafa athygli og verið vel sóttar.

Óskað er eftir hugmyndum að samsýningum þar sem viðfangsefni, vinnuaðferð eða aðrar hugmyndir tengja verk listamanna en einnig koma til greina sýningar sem fela í sér greiningu eða sýn á verk ákveðins listamanns. Jafnt koma til greina sýningar á verkum samtímalistamanna og sýningar sem fela í sér sögulega greiningu.

Frestur til að skila inn tillögum rennur út sunnudaginn 30. október 2016. Aðeins er tekið við efni rafrænt á netfangið hafnarborg@hafnarfjordur.is

Umsóknarferlið er tvískipt.

1. Hluti

Í fyrri umferð er óskað eftir eftirfarandi upplýsingum:

– Lýsing á verkefninu þar sem lögð er áhersla á hugmyndina að baki sýningunni. Hámark 1000 orð.
– Ferilskrá sýningarstjóra.
– Stuttar ferilskrár listmanna / listamanns og annarra sem lagt er til að verði hluti af sýningarverkefninu.

Gefið eins nákvæma lýsingu og unnt er en virðið uppgefinn orðafjölda. Ekki er tekið við sýningarskrám, myndefni eða dvd-diskum í fyrstu umferð. Kynnið ykkur húsnæði Hafnarborgar áður en tillögur eru sendar inn. Listráð Hafnarborgar metur innsendar tillögur ásamt forstöðumanni og velur tillögur til frekari skoðunar.

2. Hluti

Sýningarstjórum sem eiga tillögurnar sem valdar eru til frekari skoðunar er boðið að kynna hugmyndir sínar og senda inn ítarefni s.s. sýningarskrár, myndefni eða dvd-diska auk þess sem vinna þarf að raunhæfri fjárhagsáætlun fyrir sýninguna. Haustsýningin 2016 verður valin úr þessu úrtaki fyrir 2. janúar 2016.

Sendið tillögur á netfangið hafnarborg@hafnarfjordur.is. Send verður staðfesting á því að tillagan hafi borist. Vinsamlega hafið samband ef staðfesting berst ekki. Allar niðurstöður verða sendar með tölvupósti.

Með því að kalla eftir tillögum er verið að opna fyrir nýja sýn á myndlist en jafnframt gefa nýjum sýningarstjórum tækifæri til að vinna sýningar. Reiknað er með að sýningin og vinnan við hana falli að fjárhagsáætlun safnsins eða að leitað verði leiða til að fá sérstakan stuðning við verkefnið.

Við mat á tillögum verður skoðað:

– Val á listamönnum.
– Hvort sýningin kynni nýstárlega sýn á myndlist – innihald og/eða miðla.
– Hvort verkin á sýningunni eru ný eða eldri verk eða blanda nýrra og eldri.
– Hvort sýningin hafi sérstaka skírskotun til Hafnarborgar þ.e. safneignar, umhverfis, bæjarlífs  osfrv.
– Hvort sýningin nýti rými Hafnarborgar á frumlegan hátt.
– Ferill sýningarstjóra (frekar er verið að leita eftir sýningarstjórum sem ekki eiga langan feril að baki).
– Tillögur að dagskrá í tengslum við sýninguna (leiðsögn, málþing, námskeið).
– Tillögur að hugsanlegri útgáfu.
– Að kostnaður við verkefnið sé innan viðráðanlegra marka (nánari útfærsla kostnaðar er í síðari hluta ferlisins).

Teikningar af sölum Hafnarborgar eru hér fyrir neðan. Þær eru til viðmiðunar við undirbúning tillagna en ekki er ætlast til að sýningar séu hannaðar nákvæmlega inn í rýmið.

Grunnmynd-af-öllum-sölum

Sendið tillögur á netfangið hafnarborg@hafnarfjordur.is

Merkið póstinn Haust 2017.

Nánari upplýsingar í síma Hafnarborgar 585 5790

hafnarborg-juni2016

Starf í boði

Hafnarborg leitar að umsjónarmanni húss og safneignar. Spennandi, fjölbreytt og skemmtilegt starf í boði.

https://radningar.hafnarfjordur.is/recruitmentdmz/rcf3/ViewJobOnWeb.aspx?jobid=STJ16005

Hafnarborg

Eiríkur Smith – Kveðja

Eiríkur Smith, listmálari lést á Hrafnistu föstudaginn 9. september síðastliðinn, 91 árs að aldri. Hann fæddist 9. ágúst 1925 í Hafnarfirði.

Ferill Eiríks var í senn langur og margbreytilegur. Hann tókst á við málverkið sem tjáningarform þar sem maðurinn var oft í forgrunni en landið og mannanna verk mynda magnþrungna umgjörð.

Árið 1990 afhenti Eiríkur Smith Hafnarborg um 400 verk til eignar. Þessi gjöf var einkar höfðingleg og er safninu ómetanleg sem uppspretta bæði rannsókna og sýninga. Jafnt og þétt hefur verið bætt við safneignina með það að markmiði að í Hafnarborg sé varðveitt safn verka sem gefur góða yfirsýn yfir feril listamannsins.

Eiríkur kannaði sífellt nýjar slóðir í list sinni og tókst óhræddur á við ný viðfangsefni. Verk hans hafa átt greiða leið að hjarta almennings.

Eiríkur Smith og Hafnarborg hafa verið samferða allt frá opnunarsýningu Hafnarborgar árið 1988. Verk hans halda nú áfram að vera hluti safnkostsins þar sem almenningur getur notið þeirra á ólíkum sýningum safnsins.

Starfsfólk Hafnarborgar sendir fjölskyldu Eiríks innilegar samúðarkveðjur.

14022369_1177431962302328_8439463045190578481_n

Fyrirlestur í LHI

Jenny Nordberg heldur fyrirlestur í Listaháskólanum í dag, fimmtudag, 25. ágúst kl. 12.15.

Sjá viðburð hér:

Jenny Norderg er sænskur iðnhönnuður og hefur á síðustu árum unnið að því að víkka út mörk hönnunar og skilning fólks á möguleikum hönnunar. Jenny Nordberg mun í fyrirlestrinum segja frá rannsóknum sínum og þverfalegum aðferðum. Verk hennar, hvort sem um er að ræða tilraunaverkefni, hönnunarfræðileg eða markaðsmiðuð verkefni, eru ætíð drifin áfram af þörf fyrir að fara nýjar leiðir og sporna við ábyrgðarlausri fjöldaframleiðslu. Stíll hennar einkennist af brútalsima og naumhyggju sem hún tvinnar saman á áhugaverðan hátt og treystir gjarnan á tilviljanir í ferlinu. Jenny Nordberg hefur í verkum sýnum, sem oft fljóta á mörkum myndlistar og hönnunar, beint sjónum að aukinni neysluhyggju, og hvernig megi bregðast við henni í framtíðinni.Þannig leitast hún við að umbreyta þeim forsendum sem gengið er út frá í hönnun og hvetja hönnuði til að taka ákveðnari afstöðu um forsendur eigin hönnunar. Jenny Nordberg er með MFA gráðu í iðnhönnun og er búsett í Malmö í Svíþjóð.