Elías B. Halldórsson

Verk úr safneign

Í Sverrissal eru nú uppi verk úr safneign Hafnarborgar eftir Elias B. Halldórsson (1930-2007) en árið 1993 gaf hann safninu öll grafíkverk sem hann hafði unnið fram til þess tíma eða um 68 verk. Verkin vann hann flest frá 1963 til aldamóta. Á ferli sínum vann Elías jöfnum höndum í olíu og grafík. Grafíkverkin eru að stærstum hluta tréristur, sem sýna fjölbreytt myndefni allt frá daglegu amstri til nautnafullra athafna og myndefni sem hann vann útfrá ljóðum eða öðrum textum. Á sýningunni eru meðal annars verk sem hann vann við ljóð sonar síns Gyrðis Elíassonar. Sýningin bregður upp myndheimi listamanns sem hóf feril sinn um miðja síðustu öld, fór ætíð eigin leiðir og sigldi til hliðar við meginstraum myndlistarinnar. Þó málverk Elíasar hafi einkum verið óhlutbundin er heimur frásagnarinnar nálægur í grafíkverkunum og áhugi hans á bókmenntum augljós. Sýningin bregður upp mynd af heimi sem oft virðist dimmur en er jafnframt glettinn, kraftmikill og ríkur af hugmyndum þegar kemur að útfærslu teikningarinnar í fast form tréristunnar. Listamanninum tekst að koma til skila andrúmslofti í einföldu formi tréristunnar þar sem efniviður og viðfangsefni skapa áhugaverðan heim.

Elías B. Halldórsson er fæddur 1930 á Borgarfirði Eystra. Hann stundaði nám við Myndlistar- og handíðaskólann og hélt svo erlendis í framhaldsnám, fyrst til Stuttgart í Þýskalandi og síðar til Kaupmannahafnar. Fyrstu einkasýningu sína hélt Elías í Bogasal Þjóðminjasafnsins 1960 og árið 1992 sýndi hann í fyrsta skipti í Hafnarborg.