Sýningarlok og leiðsögn

Sunnudagurinn 22. október er síðasti sýningardagur sýningnanna Málverk – ekki miðill í aðalsal Hafnarborgar og Erindi, innsetning eftir Önnu Júlíu Friðbjörnsdóttur í Sverrissal.

Klukkan 14 sama dag mun Jóhannes Dagsson, listheimspekingur og lektor við Listaháskóla Íslands, vera með leiðsögn um sýinguna Málverk – ekki miðill.

Jóhannes Dagsson er sýningarstjóri sýningarinnar en hugmynd hans að sýningunni var valin úr innsendum sýningartillögum síðastliðið haust þegar kallað var eftir tillögum að haustsýningu ársins 2017 í Hafnarborg.

Sýningin Málverk – ekki miðill fjallar um málverkið og forsendur þess í því eftir-miðla umhverfi sem einkennir list samtímans. Er hún tækifæri til að hugsa um þá hugmynd að málverk verði best skilið sem eitthvað annað en sá miðill sem listamaðurinn velur sér að vinna í.

Listamenn á sýningunni eru Fritz Hendrik Berndsen, Hildur Bjarnadóttir, Hulda Stefánsdóttir, Ingunn Fjóla Ingþórsdóttir, Jakob Veigar Sigurðsson, Magnús Helgason, Melanie Ubaldo, Sigurður Guðjónsson og Þorgerður Þórhallsdóttir.